Pope Francis don pray for di victims of di gunmen attack wey happun for Saint Francis Xavier catholic church for Owo, Ondo state southwest Nigerian on Sunday.
E no dey clear how many pipo die for di attack wey happun during mass but witnesses tok say dem see pipo carry out six deadbodi while plenti pipo bin dey wunjure.
- ‘No matter what Nigeria no go give in to wicked pipo’ – President Buhari tok as im mourn death of Ondo worshippers
- Police tok wetin preliminary investigation show
One Vatican statement say e learn say dozens of pipo die.
Di Pope “pray for di victims and for di country, wey dey painfully attacked at time of celebration, and e entrust everyone to di Lord, dat God might send Im Spirit to console dem,”
Officials don warn say di number of casualties fit rise.
Nigeria’s President, Muhammadu Buhari, don condemn di attack calling it “heinous”.
One week ago, dem kidnap di head of di kontri Methodist church; dem relaese am after dem pay ransom.
Wetin di Catholic Diocese of Ondo tok?
Meanwhile di Catholic Diocese of Ondo for say dem never sabi di identity of di gunmen wey attack di worship centre early Sunday.
For statement dia tok-tok pesin Rev father Augustine Ikwu sign, dem say “di incident wia many pipo die, odas injure and di church dey violated happun for time wen holy mass dey go on.
“Dem say security agencies don dey deployed to di community so dem go fit handle di situation, dem pray for God intervention to bring back peace and calm.
Di Catholic Diocese add say all di priests and Bishop for di parish dey safe and non of dem dey kidnapped.
Dem urge Nigerians to pray for Owo pipo and di state at large.
Police tok wetin preliminary investigation show
Di state police command for dia preliminary investigation reveal say, “di assailants approach di church during service come begin shoot from outside di church while odas wey reach four in number shoot directly into di church”.
Odunlami Funmilayo wey be di state tok-tok pesin add say:
“di state police commissioner don order immediate deployment of armed and specialised policemen to di area to restore normalcy and fortify di entire community.”
Meanwhile, di CP don also order forensic investigation into di attack.
How state govnors react
Owo church attack dey offensive to di Church of Christ’ – Okowa
Governors of Delta and Edo states don condole with di goment and pipo of Ondo state over di attack on worshippers for Owo.
Delta State State Governor Ifeanyi Okowa don tell sorry to im brother Governor Rotimi Akeredolu and di pioo of Ondo state for di attack wey happen to worshippers for St. Francis Catholic Church Owo.
Sen. Ifeanyi Okowa say di attack no only dey barbaric but e dey offensive to di Church of Christ and e stand in solidarity wit di Ondo pipo for dis trying time.
Edo State Governor Godwin Obaseki also condemn di attack on di Church.
Obaseki tell sorry to families wey lose dia loved ones, come tell Governor Akeredolu say im no dey alone as dem go make sure say dem arrest di pipo wey responsible for di attack so dat kain tin no go happen again .
Govnor Babajide Sanwoolu of Lagos state join oda pipo to condemn di attack wey e describe as ”crime against humanity.
E say ”attacking congregation and shedding innocent blood, not only for di temple of God, but anywhere na condemnable act.
On behalf of the Government and People of Lagos State, I commiserate with Gov. @RotimiAkeredolu the people of Owo, the Priest and parishioners of St. Francis Catholic Church, Owo, families of all the victims, and the entire people of Ondo State over the tragic killings today.
— Babajide Sanwo-Olu (@jidesanwoolu) June 5, 2022
Govnor Samuel Ortom of Benue state also comot to condemn di attack.
Di govnor call on security operatives to as soon as possible fish out di killers and prosecute dem for wetin dem do.
Ogun state govnor Dapo Abiodioun on im part express grief over di incident and condole with pipo of Ondo state.
Di govnor say killing worshippers for church show say di attackers dey ‘satanic’ and ‘barbaric’.