One French research joinbodi, Inserm health research group don tok say plan dey to begin testing alias clinical trials of di Bacillus Calmette-Guerin special injection aka BCG vaccine as part of di fight against coronavirus for Africa.
Tori be say some recent studies wey scientists for di French National Institute of Health and Medical Research -aka – Inserm do show say fewer deaths from coronavirus dey comot from kontris wey dem dey administer di BCG vaccine.
- Coronavirus lockdown: Double wahala for Abule Ado fire victims
- Chinese city don ban eating of cats and dogs
BCG vaccine na special injection wey doctors dey give pikin wey dem born newly in order to protect dem for places wey tuberculosis dey common.
Di Inserm group also tok say dem dey also plan clinical trial for European kontris, and in Australia and any testing for Africa go follow dis ones.
Currently, no drugs dey wey fit cha cha prevent COVID-19, and even sef no vaccine. As di virus don waka across di world touch pass 0ne million pipo, scientists dey work at breakneck speed to identify ways to slow or stop di disease.
Even WHO neva give anybodi go ahead or tok pim for dis BCG tori wey dey fly upandan.
- Coronavirus Symptoms – Everitin you need to know dey here
- Face mask fit protect you from Covid-19?
- How to self-isolate to prevent di spread of Covid-19
- Africans wey don catch, die or recover from Covid-19 outbreak
- Garlic, ice cream, heat, odas dey among fake coronavirus advice you need to ignore
So wetin start dis question weda France don find cure for Coronavirus?
Well na afta two doctors for France, Jean-Paul Mira, head of intensive care at Cochin hospital for Paris, and Camille Locht, head of research for Inserm enta racism wahala with statements dem make say make dem test di vaccine as protection for coronavirus for Africa on top say di continent no get masks, treatments, resuscitation.
Di statement make Africans vex sotay former footballers like Didier Drogba and Samuel Eto’o comt to tok for social media say make dem no take African pipo as human guinea pigs. Eto’o call di doctors say dem be killers.
It is totally inconceivable we keep on cautioning this.
Africa isn’t a testing lab.
I would like to vividly denounce those demeaning, false and most of all deeply racists words.
Helps us save Africa with the current ongoing Covid 19 and flatten the curve. pic.twitter.com/41GIpXaIYv
— Didier Drogba (@didierdrogba) April 2, 2020
Questions still dey continue as di number of Covid-19 case for di world don clib to ova a million.
WHO -World Health Organization wey be di joinbodi authority for di whole world wey go fit give reen light for dis matter never tok anytin as e concern di BCG vaccine ontop coronavirus.
Even oda scientists, like researchers from di Murdoch Children’s Research Institute inside Australia (MCRI) wey follow wan do clinical trials wit di BCG say dem no expect di BCG vaccination to be cure or a perfect method of prevention.
However, dem dey claim say di vaccine fit offer an extra round of defense if pipo fit use am alongside di protective equipment wey dem dey apply for healthcare settings.