Founder of di Synagogue Church of All Nations, Pastor T.B. Joshua don explain why YouTube suspend Emmanuel TV channel from dia platform.
Earlier, Prophet TB Joshua bin announce on di ministry social media platforms earlier say YouTube don suspend Emmanuel TV channel (wey di church own) on top accuse of “Hate Speech” wey lead to plenty reactions from im members and pipo wey dey follow di ministry programmes for di video sharing website and oda social media handles.
For di video wey im post for Twitter, di pastor bin tok say e get one man wey be gay, wey di spirit of man dey torment and no gree make e settle down wit woman.
- Facebook don shut down Prophet TB Joshua page?
- Twitter in Ghana, Google for Nigeria – see di Tech giant offices wey dey Africa
Di pastor during prophesy time for service say “E get one gentleman for here, you get di spirit of man, you be man but you no how dis thing take happun. You wan settle down but you get heart for man. Di spirit of man dey torment you, you no fit help yourself. E get one time you get woman for your life but you no get time for her. Di spirit of man dey toment you, come out for deliverance.”
This is the video that led to Emmanuel TV’s suspension from @YouTube as it allegedly contained ‘Hate Speech’ https://t.co/rFDW1FA8js
Our mission is to share God’s LOVE with everyone, irrespective of race or religion, and we strongly oppose all forms of hate speech! @TeamYouTube
— TB Joshua (@SCOANTBJoshua) April 15, 2021
Di man come out and confirm say na true wetin di man of God tok.
E say im dey attracted to man, get relationship wit man. E say di sprit go dey tell am to mingle wit man and e don dey torment am for more dan 20 years. E add join say im go draw tattoo for hand to take attract men and get affair wit dem, even if dem no return im lust, e go dey do am to get sex wit animals.
For di announcement of di suspension for dia Twitter page, di ministry clear am say “Emmanuel TV mission na to share di love of God wit everyone – e no mata di race or religion – and dem strongly oppose all forms of hate speech! We don get long and fruitful relationship wit YouTube and believe say dem hurry make di decision.
Plenty pipo don react to di suspension of di channel.
According to reports, di channel get over 1,800,000 subscribers and 600,000,000 views before e chop suspension and e dey among di largest and most watched Christian ministry on top di video-sharing platform.