Jennifer Lopez and Alex Rodriguez don break up dia engagement?
Dis na di kwesion many pipo dey ask dis morning afta news of di American singer and her finance begin trend for social media.
BBC Pidgin no fit independently verify say as at today Jlo and Alex split.
However plenti American media dey report say sources wey dey close to di couple say di American singer and di former professional baseball player and businessman don go dia separate ways.
Di two couples neva tok anything about dia relationship lately for dia social media pages.
Jlo and Alex last post before split tori break
On Thursday, J.Lo post one video montage wey she dey laugh and write say: “Find a good reason to laugh today.”
While on Friday, Rodriguez post selfie of imsef inside one yacht off di coast of Miami and write say;
“No mind me, I just dey take mysef sail-fie. What be your plans for di weekend?”
Jennifer Lopez wey be 51, get engaged to Alex Rodriguez wey be 45 for 2019 afta two of dem bin date for two years.
Dem bin postpone dia wedding twice, sake of COVID-19 quarantine last year for affecting dia plan wedding wey suppose happun for Italy.
For December 2020, di “Hustlers” star bin reveal on Andy Cohen’s radio show say she bin dey kweshion whether or not to walk down di aisle alias do wedding.
“We bin don talk about (not getting married) for sure,” Lopez respond to Cohen, after di radio presenter ask her about Goldie Hawn and Kurt Russell’s relationship (Di couple don dey together for over 35-years and never marry).
Lopez add say, “With like di Goldie thing and Kurt, you think, you even get to think like dat? Make we think like dis?”
Lopez continue: “I mean at our age, we both don bin married before, e dey like, make we get married? Make we no do? Wetin e mean for us? And e just, e come down to like personal, like, wetin we wan to do? Definitely no rush dey though.”