Abia State curfew: Aba police station attack for Abayi cause government curfew today

Abia State goment for South-East Nigeria don announce one million Naira for any one wey go fit provide beta informate for wetin happun for one police station for Abayi-Aba for early mor-mor on Tuesday.

Di attack wey happun dis morning bin lead to death of pipo and also dem tiff different arms and ammunition from di station.

Dem tok dis one for inside statement wey di Commissioner for Information, Abia State, John Okiyi Kalu sign, and also impose okada ban for major cities for di state from 7pm to 7am from di 23rd of February, 2021.

Di goment confam di deaths and weapon theft for di attack wey dem call “mindless and cowardly”.

Di statement call for citizens of di stat to shine dia eye well-well as dem dey waka and an increase of security for banks and oda businesses for di state.

Even as dem tok say dem dey work with security agencies ot make sure say dem catch di pipo behind di attack, sharp-sharp.

"Abia State curfew news today"

Getty Images

Police station Abayi attack – How e happun

Abayi police station inside Aba wey be commercial center of Abia State, south east Nigeria cath fire burn down and tori be say na yet-to-be-identified hoodlums na im set di police stateion on fire in di early morning hours of Tuesday.

Di hoodlums also burn all di operational motor wey dem park within di premises of di police station.

Police Public Relations Officer for Abia State state Geoffrey Ogbonna say hoodlums numbering over one hundred bin attack di police station from one nearby compound wit intention of taking over di station.

Di Police tok tok pesin add say di attackers wey free some suspects inside di police station pour petrol into di station before dem enta am.

He add say some policemen on duty try fight di hoodlums inside gun battle, wey result to di death of one policeman and some hoodlums wey die, while many of dem pick race run away wit bullet wounds.

Ogbonna reveal say police done arrest some of di hoodlums, while dem dey search for those wey still dey on di run.

He beg all health facilities inside di state especially inside Aba to report anybody wit suspected bullet injuries wey come for treatment to di police.

Abia State curfew

Di last time Abia State Government declare curfew wey mean movement restriction, na for October 2020 wen Govnor Okezie Ikpeazu bin put 24-hour curfew inside two major cities for di state: Aba and Umuahia.

Di curfew dat time na sake to maintain law and order afta protests against police brutality alias “EndSARS Protest” turn violent.

Wen kasala burst for most states in Nigeria ontop security, dem dey use curfew take address di mata.