House of rep on school resumption: See states where schools no go resume on January 18

Even though Federal government for Nigeria give go ahead for schools to resume today all across di kontri, some states say schools go still remain closed.

On 14 January, Nigeria Federal Ministry of Education say dem do comprehensive appraisal of di coronavirus situation for Nigeria and serious consultations with relevant stakeholders, including State Governors, Commissioners of Education, Proprietors and heads of institutions, staff unions and students before dem agree to give go ahead for di schools to resume.

For di statement wey ministry of Education release, dem add say dem go constantly review all dis measures wey school must follow for dia reopening and advise teachers, school administrators and oda stakeholders to ensure strict compliance.

But even though di federal goment don okay resumption of schools, lawmakers for di kontri House of Representatives don frown at di idea.

Prof Julis Ihonvbere, for statement on Saturday, on behalf of di house committee on basic education, oppose di Monday resumption date as di house question if di kontri truly dey prepared for school resumption.

States where school resumption dey on hold

Edo state: Edo State Government suspend school resumption down to all educational institutions for di state including tertiary institutions.

Di government note say dem go review di directive on February 1, 2021, wen dem go evaluate di outcome of efforts to check di spread of coronavirus.

Secretary to di State Government, Osarodion Ogie wey tok dis one for statement, say di state government dey take drastic measures to limit di spread of di virus and protect lives and livelihoods for di state.

Kaduna state: For Kaduna, di state government also annonce say make all schools within di state remain closed until further notice.

Di state permanent secretary, ministry of education, Phoebe Sukai Yayi, add say dis directive include federal institutions and dem go announce date for resumption afta di government access di situation.

Wetin make Nigeria government reopen schools

Afta di consultation wit stakeholders, Nigeria government say all of dem agree say make di resumption date of 18th January remain, while parents and every institutions must folow full compliance with Covid-19 protocols wey include;

  • Compulsory wearing of Facemasks by all students, teachers and workers inside all schools.
  • Temperature checks and hand washing facilities wey go dey strategic locations inside all schools
  • Constant supply of water and sanitizers
  • Make sure say pipo maintain social distancing and stop large gatherings like assembly and visiting days.
  • Avoiding overcrowding, including limitations inside class sizes and hostel occupancy.
  • Make sure say functional health clinics dey available with facilities for isolation and transportation of suspected cases to medical facilities
  • Obey all oda non-pharmaceutical protocols, restrictions and containment measures according to wetin di e PTF prescribe/ approve from time to time.