Covid 19 Nigeria update: Ekiti State impose curfew as NCDC gov ng update show over 100,000 cases

Covid 19 Nigeria update: Ekiti State impose curfew as NCDC gov ng update

Getty Images
Health officials carry deadi bodi of pesin wey die of sickness wey be deadly virus

Covid-19 second wave don make goment for Ekiti state southwest Nigeria to place new curfew wey mean movement restriction for di state.

Di goment also ban gathering of more than 20 pipo for one place till further notice.

Di curfew go start from 8pm to 6am daily starting from Monday January 11, 2021.

Commissioner for information Akinbowale Omole say goment wan dey proactive and take beta steps to protect her citizens make dem no fall to di virus.

E say na only pipo wey dey do essential duties dey free to move around during the curfew time.

According to di statement, di restrictions still give worshipers chance to do two services on Friday, Saturday and Sunday and all di services no go pass 2pm in di afternoon.

E say enforcement agent don get directive to deal wit defaulters.

Di commissioner advise pipo to stay safe and observe covid19 protocol, wash hands, wear face masks and use sanitizers.

Second wave of covid-19 just dey spread fast fast wey make goment dey try reduce di spread.

Wetin go happen now wey Nigeria cross 100,000 cases of Covid19?

Nigeria Centre for Disease Contro [NCDC] don confam say Nigeria don cross 100,000 cases of pipo wey test positive to Coronavirus [Covid19].

Nigeria Centre for Disease Control for one new update dem release for dia website [] di kontri confam 1024 new cases in di last 24 hours.

Already public university lecturers de kick against di idea to reopen schools on 18 January sake of di rising covid-19 cases across di kontri, according to local tori.

From di 1024 new cases of [COVID19] inside Nigeria; Lagos-653 Plateau-63 Benue-48 Zamfara-45 FCT-42 Rivers-27 Ondo-26 Adamawa-26 Kaduna-22 Edo-18 Ogun-16 Imo-12 Kano-9 Yobe-6 Ekiti-5 Jigawa-4 Osun-2

Di good news be say of dis total number, 80,030 don dey discharged while 1,358 deaths.

As tins be so Nigerian federal goment through di presidential task force on Covid-19 dey still beg kontri pipo to obey di coronavirus guidelines alias covid-19 protocols in order to avoid anoda lockdown.

But state governments don dey begin to consider separate lockdowns or curfew to check the spread of di covid palava.

All You Need to know about di first batch of Covid-19 Vaccine to Land Naija

Di first set of Nigerians to get di Pfizer -BioNTech COVID -19 vaccine go get dia first shot for March 2021.

Di kontri di expect to take delivery of 100 thousand doses of di Pfizer vaccine for end of January wey go reach only 50 pipo.

Di vaccine na donation from di COVAX facility and di aim na to try slowdown and interrupt di transmission of di virus for di kontri.

Di oga kpata-kpata of National Primary Health Care Development Agency,( NPHCDA) Faisal Shuaib bin announce say dis first batch no be for veribodi.

Who dis vaccine go reach?

-Health workers wey di work for isolation and treatment centres across di kontri go be di first pipo to take di vaccine.

-Strategic leaders

-Oda frontline workers like immigration officers dem for Airport.

-Some Police and customs officers dem

-Pipo wey dey work for covid lab

-Old pipo wey don reach fifty years and above

-Pipo wey no old but get serious sickness wey dey quick kill.

How Much di Vaccine go cost

Dis first batch of vaccine dey free for everyone. Pesin no gatz pay moni to get immunised.

Dis na becos goment no pay shishi for di vaccine as dem get am as donation from di COVAX facility.

While Naija dey wait for free donation, oda African kontries lie South Africa don pay to get one million doses of di vaccine to immunise dia citizens.

Any Oda Vaccine Go Enta Naija?


Di Nigerian goment dey yarn wit China, Russia and oda pipo dem to get about 42 million doses of anoda different kind of Covid -19 vaccine.

Di NPHCDA wey dey in charge of di vaccine go introduce di vaccine in four pahses.

While di Pfizer one go dey ground for di first quarter of di year, odas like di moderna vaccine go come within di second, third and fourth phase.

How many dose pesin gats take?

Before di vaccine gatz work for your body, you gatz take two doses of di vaccine.

Dem go immunise first and afta three weeks, you go den take anoda one.

Sake of say you take di vaccine no mean say u no go fit dey infected again-dis na why health expert say make pipo kontinu to wear face masks and follow all di Covid protocol to avoid any kasala.

How di vaccine go take enta Nigeria

-Two weeks before di vaccine go land Nigerian, di NPHCDA go get pre alert say di vaccine go enta di kontri, dem go den issue a job order to dia clearing agent.

-Dem go also issue a notification letter to di customs and Nafdac so dem know say di vaccine show.

-Di Vaccine go first arrive for Nnamdi Azikiwe International Airport

– and as soon as di vaccine land, di clearing agent go go airport wit officials of Nafdac and Customs and den, dem go do documentation

-Den dem go move di vaccine to di National Strategic Cold store, Abuja wia ultra cold chain freezers dey to store di vaccine

-Before dem go load di vaccine, di Nafdac Officer wey follow dem go take sample from everi batch of di vaccine and take dia office for testing.

Afta di testing, dem go certify give NPHCDA pipo say di vaccine dey safe.

At di national level dem go store di vaccine for di ultra cold chain for NCDC labs before dem go distribute am to di zonal cold stores for di six geopolitical zones for di kontri

namely Kano, Bauchi, Lagos, Enugu, Warri and Maiduguri.

Timeline for di Vaccine:

January- Micro planning and training of health care workers wey go carry out the vaccination

February- early February Covid -19 implementation training activities

February- Covid 19 pre-introduction spots checks

Fberuary/March first immunisation of di fifty pipo

Transportation Plan of di Vaccine To States

No state go get di vaccine except dem show say dem get capacity to implement dia mimap out plan by di NPHDA

Dem go transport di vaccine inside dry ice inside insulated thermal container wey dey sealed

So wen state dey ready for implementation , di NPHDA go take di vaccine to dem a day before.

At di state level di vaccine fit stay for +2 for five days for dia normal refrigerator

Right from di time di vaccine come, security go dey kampe to monito everytin.

For both state and service delivery point, security pipo go dey around for protection.

Di goment di yarn are ongoing wit Alstom Prefab Nigeria Limited for the production and distribution of dry ice for the transportation of the vaccines