Kankara: 400 students dey miss afta school attack for Kastina, President Buhari home state

Kankara

BBC

At least 400 students dey miss afta gunmen raid one school on Friday night inside Katsina state, Northwest Nigeria.

Di Government science secondary school – wey be all boys boarding school inside Kankara local council area of di state, get population of more than 800 students, according to report.

Residents say only 406 of di student na im dem don so far account for.

Kankara

BBC

How di attack take Happun

Shooting happun for di streets of Kankara town for at least two hours on Friday night.

Wen di shooting stop, news come out say gunmen don attack di Government Science Secondary School and many students na im dey kidnap.

One police tok-tok pesin tell BBC say security personnel don dey able to chase di attackers. But e no gree confam weda di attackers kidnap any students.

Dem don already deploy Police go di area to help di security dia and look for missing students. Many parents don go withdraw dia children from di school for now.

Kankara

BBC

Eye Witness Account to BBC Pidgin

One eyewitness don narrate to BBC Pidgin about how armed men storm Government Science Secondary School for Kankara LGA, Katsina State, northwest Nigeria, come kidnap dozens of secondary school students.

Di eyewitness wey dey stay Kankara town explain to BBC say plenti gunmen land dia town on Friday night kill gateman and pack students comot from Government Science Secondary school.

Kankara

BBC

Tok tok pesin of Katsina Police Command, Gambo Isah also confam di incident to BBC Pidgin say true true, gunmen attack Kankara town on Friday.

According to am, di school dey for di entrance to di town so e no dey surprising say na di first place wey di gunmen attack.

“Di school dey at di front of our town so for any attack na dem go first suffer am but in dis case we get information say gunmen go attack Kankara town since around 6pm and we inform security agencies of dis plan.”

“Unfortunately by di time di gunmen enter our town around 10pm nothing like super security on ground dat na why dem kill gateman of di school and carry some students go although we dey hear dis morning (Saturday) say some of di students don escape and find dia way back.”

“I use my eyes see dem as dem dey shoot when dem enter our town and dey enter di school unfortunately security pipo no bring any help until after midnight when di pipo don do wetin dem wan do leave.”

Kankara

BBC

According to Gambo: Di “gunmen attack Kankara town and exchange gunfire with our men dem even shoot one officer. We neva confam how many students dey miss but based on di attack some students for science secondary school wey dey di town dey miss as dem run enter bush due to fear.”

Kankara

BBC

Dis attack wey happun for Government science secondary school, dey di same with di one of di school girls for Chibok wey attackers kidnap six years ago.

Dis latest attack dey happun two days after di kidnapping of one village leader and 20 odas for anoda part of Katsina state.

President Muhammadu Buhari presently dey di state as e start one week stay for im Daura hometown, to some pipo dis dey show say di level of insecurity don reach boiling level.