Di Joint Admission and Matriculation Board (JAMB) na im go conduct di Computer-Based Aptitude Test for recruitment into di Nigeria Immigration Service and di Nigeria Security and Civil Defence Corps wey go hold on December 7 and 8, 2020.
Di Ministry of Interior wey give dis informate say na partnership to ensure transparency, equity and justice for di process
Tok tok pesin for di ministry inside statement Mohammed Manga, say di collabo na to give all di youths wey apply for various posts for di services equal opportunity to be employed into di services.
Meanwhile di secretary of di ministry Mal. Al-Hassan Yakmut for inside statement say Computer Based Test for candidates wey apply go di Nigeria Immigration Service go hold on di 7th of December for all di 36 states of di federation including FCT, while dos wey apply for NSCDC go write di test on di 8th of December.
Oga Yamkut advice candidates to check dia email addresses and phone numbers for notification and venue for di test as dem go begin receive message from 6am today.
He say all di candidates dem shortlist don already get CBAT centres wey dem allocate give dem and dem must report to di centres for di exact time.
Di ministry of Interior say make candidates wey apply for di Nigeria Immigration Service visit dia website for https://immigrationrecruitment.org while dos wey apply for NSCDC and don upload dia educational records visit https://cdfipb.careers to print dia individual letters of invitation.
Compulsory things for candidates to carry go di CBT centres
- Photocopy of online Application Reference Form and any oda authentic form of ID card wey get very clear picture
- Face Mask