Champions League result: Chelsea, Barcelona, Juventus and Sevilla book dia place for next round

Callum Hudson-Odoi

Getty Images
Chelsea currently dey top Group E wit 10 points.

Chelsea, Juventus, Sevilla and Barcelona don book dia place for di knockout stages of di 2020/2021 Champions League season.

Dis na becos all four clubs don record points wey di other teams for dia group no go fit equal wit two matches remaining.

Wetin remain now for dis four clubs na to know who go top dia group at di end of all group matches.

Chelsea progress to di next round wit 2-1 win away at Rennes thanks to late goal from substitute Olivier Giroud. Callum Hudson-Odoi bin give di blues di lead for first half before Rennes striker Sehrou Guirassy equalise for di 85th.

For di other game for Group E, Sevilla also score late goal to overcome Krasnodar 2-1 to book dia place alongside Chelsea for di next round. Ivan Rakitic and Munir El Haddadi na dem score for Sevilla while Wanderson bin equalise for Krasnodar.

Goals from Sergino Dest, two from Martin Braithwaite and one from Antoinne Griezmann see Barcelona stroll to comfortable 4-0 win away against Dynamo Kiev.

Meanwhile Juventus get to rely on late goal from substitute Alvaro Morata to break di strong head of Ferencvaros, as di Old Lady beat dem 2-1. Cristiano Ronaldo na him score Juve first goal after Ferencvaros bin take di lead through Myrto Uzuni.

Tuesday Champions League results

  • Group E: Krasnodar 1-2 Sevilla
  • Group E: Rennes 1-2 Chelsea
  • Group F: Lazio 3-1 Zenit
  • Group F: Dortmund 3-0 Club Brugge
  • Group G: Dynamo Kyiv 0-4 Barcelona
  • Group G: Juventus 2-1 Ferencváros
  • Group H: Manchester United 4-1 İstanbul Başakşehir
  • Group H: Paris 1-0 Leipzig

Di oda group games go kickoff on Wednesday.