One Kenechukwu Okeke, wey describe imself as human rights activist don carry upto fifty pipo go court unto say dem get association wit di End Sars protest wey call for end police brutality.
For statement wey im publicize on top Twitter, im call di protesters say dem be “riot promoters” and tok say dem bin gada unlawful assembly, cause damage to im property and cause fear for di pipo wey dey stay for Abuja.
- Nigeria IGP order use of force wey dey lawful to protect lives, properti
- Facts about End SARS campaigners bank account wey court order CBN to freeze
E also tok say dem tell lies against am for di social media app, Twitter.
Having initiated criminal proceedings against the #EndSARS riots promoters at exactly 1052hrs WAT, 09/11/2020, we shall ensure that same is diligently prosecuted in the interest of defence, public safety and public order.
The Federal Republic of Nigeria is country of laws. pic.twitter.com/nhPJ4uN6NL
— KeneChukwu Okeke (@HumanRightsNG) November 9, 2020
E sue fifty pipo for criminal proceedings ontop di mata wey include, human rights activist, Aisha Yesufu, musicians Peter and Paul Okoye (Psquare), Folarin Falana (Falz), David Adeleke (Davido), Tiwa Savage, Journalist Kiki Mordi and plenti ooda including former footballer, Kanu Nwankwo and Pastor Sam Adeyemi.
E tok say na for Twitter dem bin plan di unlawful gathering wey lead to kasala for di kontri.
Plenti for di pipo e bin call for di suit don start to dey respond to di lawsuits.
While some pipo like Aisha Yesufu and social media influencer Pamilerin dey jolli say dem dey di list on top say dem serve dia kontri, odas dey call out Kenechuku say e no get work.
Dis tori dey land as many of di End Sars protesters wey include Lagos State End Sars Youth Panelsit dey hala say Federal goment don freeze dia accounts.