End SARS Protest: Feminist Coalition say dem go continue to fight for Nigerian women

End SARS protesters hold placard

Getty Images
File foto from 18 October as End SARS protesters hold placard for Trafalgar Square in London

One group wey dey at di forefront of di End SARS protest coordination for Nigeria don comot with open account of di donation money wey enta dia hand.

Damilola Odufuwa, wey be one of di women wey start Feminist Coalition, say di mission of di organisation na to focus on “women’s rights and safety, financial equality for women and legislative power for women”.

Feminist Coalition na di brain child of two women, Odufuwa and Odunayo Eweniyi, before dem later ask 12 oda women to join dem for di group wey dem create for July dis year.

“We get vision for Nigeria wia equality for all pipo be reality for our laws and everyday lives. Dis na why we no fit ignore the #EndSARS movement; Na something wey affect every Nigerian of every age and every gender. To support #EndSARS movement na di first project of di coalition,” Odufuwa tok.

From di beginning of di protests for di first week of October 2020, di coalition don dey provide di I-no-go-gree pipo wit food, water, up to even medical and lawyer support for some of dem wey police hold sake of di protest. Di coalition use di money wey dem raise from “from well meaning Nigerians, and supporters of di movements both here and internationally”.

Di coalition wey be only four months old don receive plenty support from Nigerians wey dey give dem gbosa for di ogbonge work wey dem don do for protesters. Dem even provide ambulance for pipo wey get injury for protest sake of how Nigerian Police Force take handle dem.

But as many pipo dey give dem pat for back, some pipo also bin dey give dem knock for head and accuse dem say dem dey encourage make pipo disobey goment but di coalition say dis one no be true.

Money mata and reaction afta Buhari speech

Di Feminist Coalition, as dem call demsef, on Thursday night announce dia decision to wash hand comot any further protest afta di kontri president Muhammadu Buhari ask youth to stop street protest and constructively engage goment to find solutions.

Dem ask pipo not to donate money join di N147m ($385,000) wey dem don already collect wey well meaning Nigerians, and supporters of the movements both here and internationally contribute.

Di group say following di address of Nigeria president Muhammadu Buhari, wey no mention di Lekki shootings, but give backing to curfews across di kontri, make pipo no comot do protest again for dia own safety.

Di group say di #EndSARS protesters across di kontri bin maintain peaceful stance for dia demonstrations and show high sense of responsibility but di way di mata be now dme dey fear for d safety of di pipo and especially di safety of di coalition members.

As for di N147,855,788.28 dash money wey pipo in support of #EndSARS donate, dem say dem spend about N60m within di last two weeks, according to di statement dem release for social media.

Breakdown of wetin dem go do with di money wey remain:

  • Treatment of protesters wey wunjure – N20,114,087.25
  • Legal support – N15,741,459.59
  • Support money for family of those wey kpai – N40,228,174.51
  • Memorial for di dead – N5,247,153.197
  • Pipo wey dey suffer mental issue from protest – N6,121,678.73

Di way forward

“We don always make am clear say we dey act as a welfare and support unit for protesters. Di job of di goment na to ensure say every civilian fit safely express dia rights, but instead plenty protesters dey experience harassment, assault and death during di protests. We plus many oda groups and individuals step up to fill dis gaps,” na wetin Odufuwa tell BBC.

Di coalition also don condemn di way Nigerian Army do protesters for Lekki toll gate and for oda parts of Nigeria on Tuesday. Nigeria Army don deny say na dia solders shoot and kill protesters for Lekki on Tuesday but di BBC Pidgin tori pesin wey dey ground confirm say na soldiers wey dey di ground shoot.

Di coalition say di action of di goment and security agencies dey “reprehensible”.