EndSARS Protests: IGP order riot police deployment across Nigeria afta curfew in Lagos

EndSARS protests


Police Inspector General Muhammed Adamu don order riot police unit to immediately enta streets sake of violence for di #EndSARS protests.

Dis order wey land Tuesday afternoon mean say anti-riot police unit and di Police Mobile Force (PMF) alias MOPOL don get collect marching order to enta road and keep di peace across di west African kontri.

Oga Adamu make dis announcement following how di #Endsars peaceful protest wey begin for early October across Nigeria but begin turn violent since dis week.

For Kano, violence burst for di EndSARS protest inside di northern Nigerian city.

For Lagos State 24 hour curfew for all parts of di state starting take effect from 4pm today. And na only essential workers and front ine responders go fit dey road afta di curfew.

Di Inspector General of Police no stop dia, e also order for massive deployment of police officers dem to prisons dem and make sure say security tight around all di prisons alias correctional facilities plus secure all oda critical national infrastructure for di kontri.

On Monday, jaguda pipo wey claim to be EndSARS protesters cause prison break for Benin and Okoh prisons inside Edo State and burn down two police stations and one police police post.

Di mata make Govnor Godwin Obaseki order 24 hour curfew from 4pm Monday 19 October.

Di senate now don ask President Muhammadu Buhari to address Nigerians on di #EndSARS protests urgently.

Still on di same day, thugs attack and burn cars for Abuja leading to ethnic attack wey don turn bloody.

For jos, north central Nigeria, di story no different as attacks di happun for dia and di final bus stop na for Lagos state wey dem burn one police station.

Amnesty International say fifteen pipo dem don die on top di ongoing endsars protest and na sake of dis di IG command di anti-riot unit to enta street and ensure say dem protect di lives and property of pipo.

IGP Adamu further yarn give for statement say make di commissioner of police for all di 36 states must find and gbab alias fish out all those wey get hand for all di attacks and arrest dem

And afta dat, make sure say dem face di law of di land and pay for dia crime.