Hanan Buhari wedding: Aisha Buhari react to viral cartoon of her daughter ceremony pictures

Nigerian First Lady Mrs Aisha Buhari tok say di cartoon wey popular northern Nigeria cartoonist Mustapha Bulama do wey show her dey show Nigerians pictures of her pikin Hanan Buhari wedding while dem dey drown inside river due to hardship dey ‘very unfair’.

Mrs Buhari tok-tok pesin Aliyu Abdullahi wey speak to BBC add say children of any leader get right to get married wen di time come whether citizens dey enjoy dia leadership or not.

“Di cartoon of Mustapha Bulama wey dey go round dey very unfair because di wedding no in any way dey insensitive to wetin Nigerians dey go through infact na because of dat a month to di wedding, madam hold meeting with her staff and tell us say she wan make di wedding be low key with no massive celebrations.”

“Di foto wey madam (Mrs Buhari) post of di couple for social media na after di wedding to thank well wishers and not to rub it in Nigerians faces. I fit tell u say di wedding of Hanan Buhari na one of di most low key of any Nigerian pikin wedding wey don happun before.”

Di tok-tok pesin also yan say di video wey dey go round wey show pipo dey spray money to di couple as dem dey dance no happun for dia side as by den di bride don join her inlaws.

“Dat video wey show some pipo dey spray naira notes no happun for Abuja na wen di bride reach her husband family side for Kaduna e happun.” Dis na wetin First Lady tok tok pesin yan.

Aliyu also say di first lady dey very mindful of Covid 19 and di guidelines wey doctors and scientists give and she make sure say for all di events wey hold for her side pipo maintain those guidelines.

Hanan Buhari wedding wey happun on 4th September 2020 come at a time when many Nigerians dey complain of hardship due to high increase in food prices, fuel and electricity tariff.

Sani Musa na social commentator wey dey stay Kano for northern Nigeria and e tell BBC say wetin di Nigerian first family suppose do na to shift di wedding to another time when mood of di kontri dey alright.

“To me personally I feel say dis wedding no suppose happun now because di kontri dey in sober mood now due to plenti hardship wey pipo dey face. For Nigerians wey no fit feed wella and pay dia bills to see president pikin dey marry and pfoto and videos dey go round go surely make many pipo vex.” E tok.