GoFundMe for Erica plus oda tins – How fans dey support Ngozi Nlewedim wey BBNaija TV show disqualify

Fans of big brother housemate, Ngozi Nlewedim AKA Erica don begin try raise $100,000 for her afta organizers of di reality TV show disqualify her yesterday.

Di Loyal fans of Erica don quick-quick go set up GoFundMe account and at present 171 pipo don donate $14,738 and di amount dey likely to increase as more fans still dey contribute.

Apart from di GofundMe, One car dealer, Chidi Mike wey be strong fan of Erica don promise to dash her N2m cash and post foto of motor wey her picture dey inside. E write for im Instagram handle say:

“Disqualified or not you be still my winner. N2 million cash money waiting for you.”


Big Brother bin disqualify Erica afta she collect her third strike for her behaviour towards her fellow housemate Laycon and her Deputy Head of House House, Prince on Saturday night.

Dem re-play di video of how badly she behave and di strong language wey she use for Laycon before dem come hand over di strike plus disqualification.

Biggie add say Erica “deface im property, wen she pour water on top di head of house bed as she no want Prince to sleep beside her and dis kain behaviour dey unacceptable”.

Big brother house get rules and regulations wey di lockdown housemates need to follow and Erica don break those rules two times before the last one wey lead to her eviction from di house.

Mixed reactions na im come from fans of di popular reality TV show afta di disqualification of Erica. Some dey surprise, odas dey happy while some odas dey sad.

Ngozi Nlewedim Alias Erica na 26 years old actress and commercial model from London, England. She study screen acting for di Met Film School inside London.

She say she dey passionate to be big time celebrity and like to get drunk and dance in front of di mirror alone.