Five sojas weh Cameroon find guilty for “2018 Anatomy of a killing” arrive military court compound on Monday morning 31 August to wait for dia sentence but military court don adjourn sentence for September 21, 2020
De two assessors no bi available, as Barrister Mben Sylvestre explain.
De sentence wey suppose happun on Monday kam one week afta military court pronounce five out of seven soldiers guilty, and free two for 17 August.
Na one year afta court hearing start, to try soldiers weh deh kill woman and pikin dem for Zelevet, Far North Cameroon.
- Two sojas inside viral video wey e show how deh di kill woman and pikin dem regain freedom?
- Cameroon army say viral video weh e di show how uniform pipo di shoot woman and pikin dem na fake
Godwe Mana Didier, Manasse Djakobei Johnathan regain freedom because deh just do follow – follow, di watch as odas bin di kill, Barrister Sylvestre Mben bin tell BBC News Pidgin.
De five guilty soldiers na: Fabassou Etienne, Bitouala Ciriaque, Tchanga Chiengang Jean B, Donassou Gorvo Barnabas, Ntienche Feuroli Ghislain Landry.
How tori for Cameroon army killing start
2018:
Viral video weh e komot for social media how soldiers waka wit woman and pikin dem weh deh call for French BH- Boko Haram, reach for some place shoot dem.
July 2018:
But goment first say no bi Cameroon army, say deh killing sef na for Mali.
September 2018:
BBC Africa Eye use high tech for documentary “Anatomy of a killing’ trace de killing.
Inside de documentary, deh show wuasi de kan guns weh soldiers use komot, deh confirm say na uniform weh Cameroon soldiers di use, who de soldiers bi and how deh shoot de woman and pikin dem plenti taims.
De woman and pikin dia crime as deh di tok inside video for French na say deh bi BH-Boko Haram.
De investigate show say soldiers shoot de woman and pikin dem for 2015.
- Court adjourn case for soldiers weh deh kill mami and pikin dem
- Burning Cameroon: Pictures wey you no suppose see
August 2019:
Cameroon goment den start trial seven soldiers, Fabassou Etienne, Bitouala Ciriaque Hilaire, Godwe Mana Didier, Manasse Djakobei Johnathan, Tchanga Chiengang Jean B, Donassou Gorvo Barnabas, Ntienche Feuroli Ghislain Landry.
December 2019
Case komot for open court, kontri pipo no bi fit enta hear de case laik before
August 2020
Military court free two of de seven soldiers say deh no get hand for de killing
August 31, 2020, military court go finally sentence soldiers weh deh kill woman and pikin dem show say Cameroon army get stain for how deh di handle crisis.