Justina and Martha Alafonye Animisa na two sisters wey wan join di Nigeria Police Force for di ongoing recruitment exercise into di constable rank.
At a time wey many pipo no get beta mind as e concern police, dis two young women from Asarama Town for Andoni local goment area of Rivers State dey excited to join police.
Justina Alafonye Animisa tell BBC Pidgin say na her father dey inspire her to become policewoman as im be peacemaker for dia family and pipo dey respect am well well.
Her father, Uriah Alafonye Animisa na Inspector and im dey work Imo State.
- Top pipo for President Trump administration wey resign, chop sack from di White House
- Nigeria police recruitment 2020: See Aug 24 screening locations for Lagos, Rivers State
- Nigerians wey apply for police recruitment 2020 go need dis tins for di screening exercise
“My father na man wey pipo respect well-well and I like di way im dey do tins because im be peacemaker. Since wen I small, I get for mind say wen I grow up, I go join police like my papa and now I happy as I wan join now.”
She add say dem bin write JAMB but dem no get admission but dis opportunity to join police wit dia O’level certificate na one dem no wan miss.
But for Martha, di way jaguda boys dey worry pipo for dia Town for Asarama naim dey ginger her to join police.
“I believe say as Policewoman, I go fit arrest those boys wey dey disturb our village and wen pipo see me dem go respect me.”
On top di bad reputation police get, Justina say, “no be evri police bad. E get di ones wey good and dey work well and na dat one I go be too. And wit di way I go conduct mysef, pipo go like police.
Di Animisa sisters dem get di full support and encourage from dia parents to join police and dem gi be pplicewomen wit a difference.