Robert Trump: US President younger brother die for hospital

Robert and Donald Trump embrace following the 2016 election

Getty Images
Robert Trump, as we see am here afta im brother win election for 2016, bin dey manage oga Donald property business

US President Donald Trump don pay tribute to im “best friend” and youngest brother afta im die at age 71.

“Na wit heavy heart I share say my wonderful brother, Robert, peacefully pass away tonight,” E tok for statement on Saturday.

Di president don visit im brother for New York hospital di day before im die, wey e tell tori pipo: “Im dey get hard time.”

E no dey clear wetin cause Robert Trump death.

Some tori pipo for America bin don report say im don sick tey tey.

“Im no just be my brother, im na my best friend,” Donald Trump statement also tok. “Im memory go live on inside my heart forever.”

President Trump son Eric describe im uncle say na “ogbonge man – strong, kind and loyal pass anytin”.

“Our entire family go miss am well-well,” e write put for Twitter.

Robert na di youngest of Fred and Mary Anne Trump five pikin, and dem born am two years afta im brother Donald.

Di one wey old pass among di children, Fred Jr, die for 1981.