WAEC timetable for 2020: See di approved past questions wey go help students pass di August West African Examinations Council exam

Di joinbody of West Africa Examination Council, WAEC get online platform wia dem set up past questions wey go help oda students wey wan write di exam perform better.

Di e-Learning Tool Kit na resources from all di WAEC approved subjects wey go help students understand better everything dem go need to pass all di subjects.

Secondary school students for Nigeria go begin write dia WAEC exams from di 17th of August.

Dis na afta goment give go ahead for students wey dey exam classes to resume afta ova three months wey dem suspend school activities sake of coronavirus pandemic.

Di final year students get two weeks for revision before di exam start.

WAEC set up dis e-learning to help students wey wan do revision for di West African Senior School Certificate Examinations for year 2020.

How to get di WAEC e-learning tool kit?

Visit di website waeconline.org.ng

For di home page you go see di different subjects wey you register for under dis six categories:

  • Civil and Mechanical
  • Mathematics and Applied Science
  • Languages
  • Sciences
  • Business
  • General

Click on any of di subjects wey you wan write di exam and you go see past questions from ova 10 years.

For inside di past questions dem break down most of di questions wey too dey give students wahala, come put di solution.

According to di timetable wey BBC Pidgin sight, di examination go begin on Monday, August 17, 2020 and end on Saturday, September 12, 2020.

Di Timetable dey here: See WAEC timetable for di 2020 examination wey go begin August 17