Ghana WAEC students ‘chook’ WASSCE invigilators plus compass, use stick break supervisor over ‘strict invigilation’

West African Examination Council (WAEC) for Ghana start dey investigate how students of Bright Senior High School attack examination officials who tighten invigilation for de school.

Over 500 students shun dey write dema exams wey dem start dey attack de WAEC invigilators wey prevent de students from cheating during de exams.

Jerry Alfred Okine, WAEC Official who dem attack narrate give BBC Pidgin how de students attack dem, “we be six WAEC invigilators, wey dem injure four of us. Dem pierce de back of one supervisor plus compass” Mr Okine reveal.

“One supervisor catch student who carry foreign material enter de exams hall so he video am, when de BNI officer arrive on de scene de student start complain; we pay for dis, dis be our life, why you no dey allow us to copy” he add.

Mr Okine allege say check like some school authorities want help de students plus foreign materials so as dem stop dis activity of sending foreign material to de school, dis make both school authorities and students bore dem.

During de attacks, de students smash most of dema phone to cover evidence of dema malpractice and violent actions.

Mr Okine explain say e be de headmaster of de school wey encourage de students to attack de external WAEC invigilators.

An emotional Jeffrey Okine talk BBC Pidgin say “I just dey try help kids write exams to secure dema future, now my life dey at risk for that… I really regret being Ghanaian yesterday.”

WAEC start investigation into disturbances

WAEC say dem start consultative engagements into circumstances make students of Bright Senior High School (SHS) for Eastern Region of Ghana launch attack on exams officials wey dem send to de school.

Public Relations Officer of WAEC, Agnes Teye Cudjoe talk Accra-based Citi FM say dem go intensify security for de school to prevent a similar incident from happening.

“Management start dey engage to look at de best solution to de disturbances wey happen. Sake of we for as much as possible, protect de lives of de internal WAEC officials and external supervisors at de centres,” she explain.

Pockets of indiscipline dis year

In one viral video, some girl students for Tweneboa Kodua SHS too destroy school property dey protest strict invigilation wey officials take supervise dema exams.

Some students dey claim say past questions wey govment distribute give dem no reflect in dema final paper, some dey talk say dis be why de students dey misbehave.

Dis year Ghana record a number of indisciplined behaviour during de WAEC final exams across de country, from students who dey diss President Akufo-Addo to de recent attacks on WAEC officials.

Ghana National Association of Teachers (GNAT) dey call on authorities to arrest and punish students who go engage in violence.