Lance Corporal Martins video: Di Nigerian Army soja wey critic Tukur Yusuf Buratai for sake of Boko Haram insurgence don die or e dey alive? – See wetin we find out

Lance Corporal Martins Idakpein na di detained Nigerian Army soja wey criticise di Chief of Army Staff, Lt. Gen. Tukur Buratai, and oda service chiefs inside viral video sake of di handling of di Boko Haram insurgency.

Regarding di latest reports by some media like Sahara Reporters wey yan say Lance corporal Martins dey feared to be dead, Army spokesman Colonel Sagir Musa tell BBC say dem no get comment on dat.

“We no get any comment on wetin u dey ask about Lance Corporal Martins.” Dis na wetin colonel Sagir tok.

Tins to know about Lance Corporal Martins

Army detain Lance corporal martins over a month ago after e make video on social media wia e criticise chief of Army staff Yusuf Burutai and oda top officers.

Later, ldakpein chop arrest and dem move am from Sokoto to Abuja. Im wife, Victoria, also chop arrest afta she give one media interview, calling for di release of her husband. (Di military later free her afta nine days in detention).

Na 22 June, 2020 di soldier drop di over 12 minute long video and days afta dem arrest. By di rules wey dey guide military operation for Nigeria, na mutiny for junior sojas to to openly oppose or challenge a lawful authority like di head of di army.

One human rights lawyer, Tope Akinyode, file lawsuit against Nigerian Army, di Chief of Army Staff, and di Attorney General of di Federation, and dem dey beg di Federal High Court to order di unconditional release of Lance Corporal Martins.

For early July 2020, Nigeria House of Representatives begin di process to rescue Lance Corporal Martins Idakpein from di continued military detention.

Following one rights violation lawsuit, on July 22, Justice A. I. Chikere of di Federal High Court, Abuja grant di soldier access to im lawyer and relative. Di judge rule say na contravention of di fundamental human rights of di soldier not to be allowed to see im family and lawyer.

As at 31 July, despite di order of Federal High Court in Abuja, asking di Nigerian Army to allow di detained soja, Idakpini Martins, see his lawyer and family, di Force on Wednesday, no obey.

Lance Corporal Martins vide tok about Nigerian soldiers fight against Boko Haram

Nigerian forces, dey hold Boko Haram flag wey dem capture

‘Dem kill four months old pikin carry di mama go’

Boko Haram don pass Nigeria problem

For dia highest peak period for Nigeria between 2013-2015, Boko Haram branch out and enta Cameroon, Niger and Chad and begin dey cause kata-kat for those kontris.

Many pipo even dey tink say no be only Nigerians be members of Boko Haram members.

In fact e do sotay, for 2015, Nigeria and dia neighbours Chad, Niger, Cameroon, Benin collabo to form di Multi-National Joint Task Force (MNJTF) say dem wan fight against Boko Haram.

Lance Corporal Martins video criticise Nigerian Army chief fight against Boko Haram

Chibok girls

Wia Boko Haram dey get dia money

Nigeria Defence Headquarters say na drug trades, money laudering from di international world na im dey fund di activities of Boko Haram plus including ransom from kidnappers.

Na why dem ask international community, European Union to chook hand to find and block di pipo wey dey fund dis terrorist joinbodi.

Boko Haram don kill pass 35 thousand, displace ova 2 million pipo

As at now di number of pipo Boko Haram don kill don pass thirty five thousand pipo and di group don comot ova 2-2 million pipo from dia houses all ova di Lake Chad region.

Even sef afta di Chibok kidnap wey ova 100 of di girls still dey dia hand almost six years on, Boko Haram still dey kidnap pipo wey don enta thousands.

For 2018, Nigerian Army join hand with di MNJTF rescue pass one thousand pipo from Boko Haram hand.