Informate don dey comot about who Dr Stella Immanuel be, why she comot to tok about hydroxychloroquine and who di group wey she bin dey wit be.
Earlier, we bin report say big-big social media companies like Facebook and Twitter don comot one trending video of Dr Stella wia she tok about how she treat pipo wit hydroxychloroquine, di melecine wey World Health Organisation declare say no dey work ontop Covid-19 patients.
But BBC Pidgin don torchlight one oda video ontop YouTube wey be like di part two of press conference wey Dr Stella and some oda doctors bin show for.
Di video show different-different doctors comot to tok including Dr Stella wey introduce herself as pastor and “God warrior princess”.
“Dis disease, dis pandemic big pass Gilead, e big pass democrats and republicans, na diabolic, spiritual battle. And sometimes we need to fight spiritual battles spiritually,” Dr Stella bin declare.
“Di pipo behind am na pipo wey no get di good of humanity for mind”.
- Why Twitter suspend Donald Trump Jr for Dr. Stella Immanue hydroxychloroquine video
- Why Facebook remove video of African doctor wey promote hydroxychloroquine for Covid-19 treatment
Who Dr Stella Immanuel be?
Inside di part two of di conference video wey trend (e dey available as di time we write dis tori), Dr Stella say be Cameroon citizen wey train for neighbour kontri Nigeria and she enta America for 1992. She also tok say she don dey US for “30 years”.
- Her full name na Stella Gwandiku-Ambe Immanuel and she be around 55 years old
- Attend Cameroon Protestant College wey be boarding secondary school for Bali, Northwest of Cameroon
- Study medicine for University of Calabar (class of 1990)
- According to her, she move to US for 1992
- She get daughter wey also train as doctor, she graduate from Baylor University and University of Westminster
- Begin career Paediatric Clinic for Louisiana
- According to document of one court case, around 2006 she operate and own Rapha Medical and Therapeutic Clinic for Lousiana
- She be pastor and founder of Fire Power Ministries for Houston, Texas. According to dia social media profile, dem dey do “deliverance, prayer and spiritual warfare”
- She don write 5 books wey dey Amazon under di name Dr Stella Immanuel
- She also write one book wit oda pastors of Nigeria-based Mountain of Fire Ministries church and anoda book under her former name “Stella Gwandiku-Tita”
- For 2019 she begin work for Rehoboth Medical Centre, wey she also own
America Frontline Doctors
Dem doctors wey tanda wit Dr Stella call demsef America Frontline Doctors (AGF) and dem be group of medical professionals wey dey take strong eye look wetin oda scientists don agree about di pandemic.
E be like say Dr Stella follow as dia member, as she wear coat with di joinbodi logo and tok for di conference wey dem organise on 27 July.
Tea Party Patriots, wey be conservative political joinbodi wey dey push for President Trump re-election, tanda gidigba to give di conference support.
For May, America Frontline Doctors founder Simone Gold, bin organise letter to Oga Trump wia im ask am to end di lockdown rules.
Ralph Norman, wey bi Republican member of di House of Representatives, bin dey with di doctors when dem deliver dia press conference wey tok about di success of hydroxychloroquine as treatment of dia Covid-19 patients.
Hydroxychloroquine conspiracy dey?
For dia conference, one AGF medical doctor accuse big pharmaceutical companies say dem dey fear to lose money because dem sabi say hydroxychloroquine dey work.
“We don hear of study wey dem do for Nigeria, India, Portugal, Italy wia dem use am [hydroxychloroquine] as prevention, e work for every case and e especially work when dem use am early… na wetin dey fear dis companies be that… dem go lose plenty money,” Dr Richard Urso bin tok.
Plenty serious debate don dey ontop social media recently about hydroxychloroquine. World Health Organisation don tok say dem torchlight say di melecine no work for Covid-19.
Di debate ginger sotay e divide Americans ontop politics, as those wey support hydroxychloroquine say President Trump support am, and those wey no want Trump na di pipo wey no want make di world sabi say di melecine wey work.
How big social media companies react
For statement to BBC News, Twitter say: “Tweets wit di video dey in violation of our Covid-19 misinformation policy. We are taking action in line with our policy here.”
“We’ve removed this video for sharing false information about cures and treatments for Covid-19,” Facebook told the BBC, confirming it was also removing other versions of the video.
YouTube told the BBC: “We have removed the video for violating our Covid-19 misinformation policies.”
BBC News also approached Breitbart, the White House and America’s Frontline Doctors for comment.