Di Ballon d’Or award to crown di world best football player no go happun for 2020 because of a “lack of sufficient fair conditions” sake of di coronavirus pandemic.
Wetin dat one mean be say, afta di organisers siddon look how tins be dem say to award any player di top prize no go dey possible as e no go “meet certain conditions”.
Na France Football dey organize di award every year since 1956.
Some of di conditions wey di organisers highlight for inside statement na say some leagues like di French league no complete dia season, therefore “dem no fit establish fair comparison”.
Barcelona Lionel Messi na im win di men prize last year, while USA forward Megan Rapinoe collect di women trophy.
- How football stars, fans react as Messi win im sixth Ballon d’Or
- Ronaldo say im deserve more Ballon d’Or pass Messi
- How Man Utd, Leicester result go affect di Premier League table
France Football say to award di prize for dis “kain” year “no make sense” for dia history.
“We no want put comma for di prize list like trophy win for exceptional circumstances due to the Covid-19 health crisis’,” na wetin dem add put.
England Stanley Matthews na di first winner of di award when dem bin dey call am European Footballer of the Year.
Dat time di award na only for European players until dem change am for 1995. When dem open am for 2007, footballers wey dey play for European club and for di rest of the world come fit take part.
Na di editorial staff of di French magazine dey compile di 30-player list of nominees, di winner na journalist from around di world go decide dat one by vote.
Argentina international Messi don won di prize for a record sixth time last year.