Sisiku Ayuk and nine oda Southern Cameroons leaders enta court for de first taim since deh appeal life sentence.
Presiding judge call dia names deh no answer. Lawyers tell de judge say deh no di understand French, but presiding judge just say make deh komot dem for court room.
Court adjourn case for August 20 wen deh no even identify and recharge Sisiku Julius Ayuk Tabe and di nine separatists leaders.
Barrister Joseph Akuwiyadze, Sisiku Lawyer say court di violate law for hear dem for language weh deh no di understand.
- Sisiku Ayuk Tabe, odas appeal fit flop if deh no pay FCFA 5m
- Cameroon secessionist leaders don get life in prison
Appeal court for centre region for June 18, 2020, adjourn case for Sisiku Julius Ayuk Tabe and nine odas again for number three taim to July 16. 2020.
Court say deh adjourn de case because de separatist leaders no bi dey for court.
Lawyers vex say na authorities di keep dia clients and deh suppose bring dem for court.
For dem, de reason no hold water as court di so-so adjourn na for deny dem justice.
Sisiku Julius Ayuk Tabe and nine odas di serve life sentence for seka secession and terrorism.
Na for August 2019 weh military court sentence de ten separatists leaders.
De leaders bin disappear for Nera Hotel for Abuja Nigeria, den appear for Yaounde for January 2018.
Sisiku and e kombi dem pay FCFA 5million for appeal de case for September 2019 and since den court di daso adjourn de case.
- President Biya free 333 prisoners, separatist leaders, lawyer react
- Cameroon president cancel prisons terms as fear for Covid-19 di high
De first hearing bi suppose for bi na for April 16 dis year and e bi kam nine moons afta, but court adjourn de case.
De reason na Sisiku and odas no come court dat day.
Den for May 21 de court no shiddon because de day na public holiday.
As deh case kam up, court adjourn again for July 16 and de reason na say Sisiku Julius Ayuk Tabe and odas no bi show for court.