Ibidunni Ighodalo family don do autopsy alias ‘doctor report wey fit show wetin cause of death’ of di 39 year old Lagos businesswoman wey die suddenly on Sunday morning.
Family sources tell BBC Pidgin say na on Monday dem conduct di autopsy for Lagos Island hospital.
BBC Pidgin still dey follow up di result of di autopsy and go update di informate later.
- 19 year old Oluwatoyin Salau death – See wetin we sabi
- Ibidunni Ighodalo deadi bodi arrive Lagos wit more tributes for di ex-beauty queen
Meanwhile, tori don dey comot of di final plans of Ibidunni Ighodalo, di Lagos businesswoman and pastor wey die for Port-Harcourt.
To celebrate her 40th birthday, she write say “I no want party, no surprise” but just to “help 40 couples to born pikin”, according to one recent revelation by her friend.
Popular musician and photographer TY Bello na di friend wey post wetin di late former beauty queen send am di night – and just hours – before she die.
Di “help” wey madam Ibidunni Ighodalo dey tok, na her passion to support couples wey wan use In Vitro Fertilization (IVF) born pikin.
‘I just wan make 40 homes happy’
At exactly 11:39pm on Saturday, dis message land di phone of TY Bello – wey tell tori pipo on Monday say na her waka to find pikin make she and Ibidunni become close friends.
No be secret say di wife of Trinity House Pentecostal church founder Pastor Ituah Ighodalo, don try many many times to born pikin with IVF but e no dey successful.
But dis no stop am to help pipo wey wan try IVF, even if e go cost her money and time.
“Di reason why e no happun for some pipo na say dem no fit do [fertility] screening, because some of di tests too cost.
And so I say to myself, make I start [Ibidunni Ighodalo Foundation] to help dem do dis kind of tests,” she bin tok for one 2018 interview.
- ‘Di day I know say dem born me and I no get vagina’
- IVF clinic no dey honest wit older women wey don pass 42 years
For Nigeria, wey tests to check weda IVF treatment go work for couples dey cost about N400,000 ($1000), and full treatment minus melecine fit pass N5m ($13,000), pesin fit begin reason di kain level of assistance wey di late Pastor Ighodalo ready to give 40 couples in honour of her 40 years birthday.
https://youtu.be/upfkIhPkO4w?t=1537
Dis na how wey many pipo, young and old, home and abroad, dey tok of di kain good heart wey Ibidunni Ighodalo get.
- IVF mistake cause woman to ‘born wrong pikin’
- 73 years old woman born twins afta 57 years of marriage
Di kain heart wey make her decide to adopt two pikin (boy and girl) and become mama to dem, even inside society wia many still see adoption as something to run from.
“Shame no dey inside adoption… I dey happy say I adopt. I get two beautiful pikin,” she bin like to tell anyone wey ready to hear her.