Ibidun Ighodalo: How di ex-beauty queen and pastor of Trinity House Lagos die – See some tins wey you fit no know about her

Ibidunni Ituah-Ighodalo don die, according to wetin pipo wey dey work wit her tell BBC Pidgin.

Tori be say di say madam Ighodalo, di former Nigerian beauty queen wey be wife to Pastor Ituah-Ighodalo of Trinity House church for Lagos, Nigeria, die for her hotel room for Port-Harcourt, Rivers State southern Nigeria.

“All I know be say she go to bed last night but no wake up again dis morning” Lawal Nurudeen her colleague wey be Manager of Elizabeth R (her company) tell BBC Pidgin.

Oga Nurudeen wey travel wit her to Port Harcourt for official project say she die on Sunday morning inside her hotel room.

Di 39 year old former Nigerian beauty queen, wife and head pastor of Trinity House church, be businesswoman and marriage counsellor wey set up NGO foundation to give support to couples wey dey find pikin to born.

At about 1pm on Sunday, 14 June, di Instagram page of her church post black foto, wey fit mean say true-true dem don suffer big loss.

And her personal Instagram page wey up until di time tori break of her death get 76,000 followers, don dey closed down.

https://www.instagram.com/p/CBagO7bFN7c/

Her family don confam di death of di former beauty queen for statement wey Asue Ighodalo sign. Di family also tok say dem go share informate of her burial as time go on. But dem no mention di cause of death.

https://www.instagram.com/p/CBbIAcdDb0w/?utm_source=ig_web_copy_link

‘Good woman wit good heart’

Tribute don dey enter for her in celebration of her life and ogbonge work. Pipo dey tok of di kain pesin wey madam Ighodalo be during her life:

https://www.facebook.com/bbcnewspidgin/photos/a.860158887523172/1520989091440145

Until her death, di former Miss Lux bin dey run Ibidun Ighodalo Foundation.

Na for February, di mother of two mark her 13th wedding anniversary wit her husband, Pastor Ituah Ighodalo of di Trinity House.

See some tins wey you fit no know about her

  • Wen she be 18-year-old undergraduate of University of Lagos, Ibidunni nee Ajayi, win Miss Lux beauty pageant.
  • She be di founder of Ibidunni Ighodalo Foundation, di NGO wey dey raise awareness on infertility mata.
  • For one 2018 interview, Ighodalo tok say she bin do IVF 11 times due to pressure from in-laws and friends.
  • She bin dey run one of di successful event planning company – Elizabeth R – wey dey decorate Lagos during Christmas.