Naira Marley concert: Wetin we sabi about di singer Abuja show

Even as Nigeria goment law say make pipo no gada pass 20 still dey in place, pipo for di kontri capital, Abuja no wan hear, as some of dem pack dem sef go Naira Marley concert.

Saturday night catch fire for Jabi Lake Mall as pipo ignore di federal goment order on public gathering to prevent di spread of coronavirus, to go jollificate, dance and groove for drive-in concert wey di Nigeria Afrobeat musician perform.

Even though goment neva reopen airports and interstate lockdown wey dem put ova two months to control di spread of coronavirus, Naira Marley somehow still find im sef for Abuja.

Di organisers say di show suppose be drive-in concert, meaning say, pipo must to come inside car, and dem must to sidon inside dia car to watch as im dey perform for stage.

But, video wey go viral for social media show as crowd gada dey dance as im dey stage dey sing and dem no observe social distancing.

As video from di concert go viral for social media, na different kind of reactions from Nigerians follow am.

For April 2020, Naira Marley togeda wit actress Funke Akindele and her husband bin enter soup afta dem take part in birthday party to celebrate di actress husband, Rasheed Bello aka JJC Skills.