Boko Haram attack: Dem kill 81 pipo come kidnap seven for Borno, northeast Nigeria

Insurgents like Boko Haram don kill plenti pipo for north east part of Nigeria since 2002 wen dem begin launch attacks.

Getty Images
Insurgents like Boko Haram don kill plenti pipo for north east part of Nigeria since 2002 wen dem begin launch attacks.

Number of pipo wey don die from one attack for Borno State, north-east Nigeria don climb to 81 according to authorities.

On Tuesday, unknown fighters arrive inside motor enter one village for Gubio wey no far from di capital Maiduguri come open fire.

Dem also kidnap seven pipo but e no dey clear who carry out di attack, but some residents blame fighters from di Islamic State West Africa Province.

But one eyewitness tell Borno State govnor, Babagana Umara Zulum wen e travel go Faduma Kolomdi village for Gubio local goment area say “na insurgents carry out di attack and dem even steal 400 cattles”.

E no dey clear as to wetin cause di attack but di govnor want make di Nigerian military carry out final onslaught wey go put an end to di insurgents.

Im say: “Last year, dem kill about same number of pipo for Gajiram like e happun again. Dis dey barbaric, e dey unfortunate. Di only solution to end dis massacre no to knock off di insurgents for di shores of Lake Chad. To do so go require collaborative regional efforts.”

Jihadists don target di area wia di latest attack take place for some time now. counter terrorism expert say dis recent attack na one of di biggest attacks on civilians dis year.