Nigerian Church reopening update: Churches, Mosques, oda places of worship don begin open but dem must follow guidelines

Different churches for Nigerian capital Abuja don open dia doors to worshippers afta dem no operate for several weeks sake of di coronavirus.

Some of di worshippers before dem go inside di church, dem gatz wash dia hands and make sure say dem come wit dia face masks.

For some of di churches, dem write dia names down but no be all churches follow dat rule.

Di presidential taskforce bin announce say church go fit start to open if dem follow di protocol wey both di taskforce and state goment dem agree.

Na on Tuesday Nigerian goment roll out new guideline wey Mosque and Church gatz follow before dem open up for worshippers.

Di presidential taskforce on Monday bin announce say places of worship go fit begin operate if dem follow di guideline as approved by di state.

Di National Coordinator for di Taskforce, Sani Aliyu say, all places of worship gatz follow a timeline of one hour per service and all church service must start around 5am and end by 8pm.

While Friday Muslim prayer, worshiper go come prayer ground 20 minutes before prayer time and leave di Mosque, 20 minutes afta.

Oga Aliyu say all places of worship must do temperature check, ensure worshipers use face masks, get hand sanitizers.

How pipo worship for Abuja on di first Sunday service since di lockdown

Pesin dey wash hand

BBC
Worshipper dey wash hand for City of Mercy Parish, Redeemed Christian Church for Abuja
Worshippers siddon for church

BBC
Worshippers siddon for church
Usher dey check worshipper temperature before she enta church

BBC
Usher dey check worshipper temperature before she enta church
Pesin dey give worshpper hand sanitiser

BBC
Pesin dey give worshpper hand sanitiser
Pipo siddon inside church

BBC

Oda rules religious centres must follow include:

  • No shaking of hand, hug or any kain join body for places of worship
  • Capacity of members go dey limited
  • Dem suppose mark areas to allow for social distancing
  • Pipo from the same household suppose stay togeda
  • Prayer section supposed dey staggered
  • All worship centres suppose get different entry and exit doors
  • Business venture for premises pf place of worship remain close
  • Dem suppose open all di window
  • Improved environmental hygiene for all places of worship
  • Frequent cleaning and disinfection of di place