Nigeria reggae music legend Majekodunmi Fasheke alias Majek Fashek don die according to e manager Omenka Uzoma wey confam e death to BBC Pidgin.
Uzoma say 57-year-old Majek Fashek die for e sleep for New York on June 1, 2020.
Di reggae music singer wey become popular sake of songs wey e sing like Send down di rain also work wit stars like Jimmy Cliff, Tracy Chapman and Snoop Dogg.
Inside Instagram video wey Uzoma bin post, e say: “dis na time for us all to celebrate e achievement, e don do a lot for Nigeria and Africa.”
E also tell BBC Pidgin say Majek go like make Nigerians and world pipo remember am “for good, for African inspiration, for e legacy and achievement”.
Uzoma add say e go good make Nigeria goment recognize di efforts of Majek Fashek and e music as national day celebration on 7th of March wey be di day dem born Majek Fashek.
Who be Majek Fashek?
Born in 1963 according to Uzoma, Majek Fashek come from Edo state, south south Nigeria.
Im get four children from di union between him and Rita but di two of dem later divorce.
For sometime now, di so long too long singer bin don dey battle wit health conditions wey according to Uzoma, “threaten e life last year wen dem carry am go hospital for England.”
Before today, di singer bin don release studio albums including Prisoner of Conscience , Spirit of Love, Rainmaker, Weep not my Children and Little Patience.