Senator Ike Ekweremadu, im wife Beatrice Nwanneka Ekweremadu go remain for London Metropolitan police custody until August 4, UK court don rule.
Westminster magistrate court give di order on Thursday 7 July, 2022.
Di court also rule say pesin wey wan donate im organ to Nigerian senator Ike Ekweremadu family no be small pikin.
Di Nigerian senator and im wife bin chop arrest for London ontop alleged ‘organ harvesting’ plot on 21 June, 2022
Senator Ekweremadu, age 60 and im wife Beatrice Nwanneka Ekweremadu, age 55, dey face charges say dem conspire to transport pesin go UK in order to harvest organs.
Police say dis na offence under di Modern Slavery Act 2015.
Di two pipo don dey Met police cell since dem first appear for court on June 23.
Di court hear Ekweremadu application afta di UK Attorney-General give approval say make di magistrate court hear di case.
Di Attorney-General also direct di transfer of di case to di Central Criminal Court in London.
Senator Ike Ekweremadu, im wife Beatrice Nwanneka Ekweremadu plead not guilty.
On Thursday 23 June, wen di politician and im wife first appear before Uxbridge Magistrates’ Court, dem rule say di two go dey UK Police custody till 7th July.
A week later, on Thursday 30th June, di court sit again based on accelerated hearing ontop di mata but still keep di two in custody.
Meanwhile, Counsel to Ekweremadu don inform di court say dem file dia bail application before di next court date.
Court adjourn di matter to August 4.
Wetin happun wen di Ekweremadus appear for Westminster magistrate court
Defendants Beatrice and Ike Ekweremadu waka enta into dock at Westminster Magistrates Court in London and speak only to confam dia names, dates of birth and address.
Beatrice (56 years-old) bin dress in a black and white shirt wit dark jacket on top.
Ike (60 years-old) wear a grey tracksuit jumper, red t-shirt and glasses.
One prison guard bin sit between di husband and wife, wey dey accused of conspiring to bring one pesin to di UK for organ donation.
Di defendants [BBeatrice and Ike Ekweremadu] dey live in North-west London.
For di court public gallery supporters, representatives from di Nigerian high commission, and family members of di lawmaker and im wife.
Di 20-minute hearing bin dey presided over by Deputy Senior District Judge Tan Ikram, wey send di case to di Old Bailey to hear am on 4th August.
Beatrice and Ike Ekweremadu remain in custody of London Met. Police.
Why Met Police arrest Ekweremadu and wife, Beatrice
Police get hint of di case on 5th May, 2022 when di complainant arrive one police station.
60-year-old Ekweremadu and im 55-year-old wife chop arrest on June 23 afta investigation by di UK Metropolitan Police Specialist team.
Met Police tok for inside one statement wey dem share wit BBC Pidgin say:
“Beatrice Nwanneka Ekweremadu, 55 [born 10th Sepember, 1966] of Nigeria dey charged wit conspiracy to arrange/facilitate travel of anoda pesin with a view to exploitation, namely organ harvesting.
Ike Ekweremadu, 60 [born 12th May, 1962] of Nigeria dey charged with conspiracy to arrange/facilitate travel of anoda pesin wit a view to exploitation, namely organ harvesting,” di statement tok.
Met Police say dem don remand di suspects for custody and dem go appear for Uxbridge Magistrates’ Court later today.
Dem launch di investigation afta detectives dey alerted to potential offences under modern slavery legislation in May 2022.
Di Met Police say dem don safeguard di child and dem dey work closely wit partners for more support.
Dem no give di gender of di child wey di suspects won harvest im organ.
“As criminal proceedings don dey go on, we no go provide further details,” di Met Police tok.
Ike Ekweremadu na former Nigerian Deputy Senate President.
Di serving lawmaker na ogbonge politician for Nigeria and im don dey Senate since 2003.
Ekweremadu na from Enugu State and im serve as di Deputy Senate President for 6th, 7th and 8th Nigerian Senate.
Di Senator hold both bachelor’s and master’s degree in law from di University of Nigeria and dem call am to bar in 1987.
Senator Ike Ekweremadu profile
Ike Ekweremadu na former Nigerian Deputy Senate President.Di lawmaker na ogbonge politician for Nigeria and im don dey Senate since 2003.
Ekweremadu na from Enugu State and im serve as di Deputy Senate President for 6th, 7th and 8th Senate.
Di Senator hold both bachelor’s and master’s degree in law from di University of Nigeria and dem call am to bar in 1987.Im also hold Doctor of Philosophy degree in law from di University of Abuja.
Di politician belong to di opposition People’s Democratic Party (PDP).
Ekweremadu bin get di ambition to contest for di 2023 governorship election for Enugu but im withdraw from di PDP primaries hours before di election.
Di politician tok say im bin make plans and develop strategies to transform di state but some pesins work against am.
Organ harvesting meaning
Organ harvesting essentially na ‘killing on demand’, dis na di selling and transplanting of organs of victims.
Na wetin international society for human right tok.
Dem say organ harvesting dey take place for various kontries for di world, especially in China, India, and on the Sinai Peninsula.
Organ harvesting simply mean di surgical procedure wey go illegally remove organs or tissues for reuse, mainly for organ transplantation.
Sometimes e dey happun against di will of di organ owner.
E also mean di removal, preservation and use of human organs and tissue from di bodies of di recently dead pesin to be used in surgical transplants on di living.
More on organ-harvesting dey here: Organ-harvesting meaning, victims & risk