Justice Olukayode Ariwoola of di Supreme Court don take oath of office as di acting Chief Justice of Nigeria (CJN) on Monday, 27 June.
Dis one dey follow as di Justice Ibrahim Tanko Muhammad put in im resignation.
President Muhammadu Buhari do di oath of office for Justice Ariwoola for swearing-in ceremony wey dem hold for di Council Chamber of di Presidential Villa, Abuja.
- ‘I wan dey normal like oda kids’ – 12-year-old Israel Ajofoyinbo
- Why Police dey go court to stop Ghana youths from protesting against economic hardships
Just some moments wey pass, Nigerian Bar Association (NBA) release statement say dem dey expect di swearing-in of Honourable Justice Olukayode Ariwoola as di Acting Chief Justice of Nigeria.
Di joinbodi of lawyers for di kontri, say Justice Ibrahim Tanko Muhammed resign from im position as CJN on Sunday night “on grounds of ill health.”
For di statement, NBA acknowledge news of im resignation, plus thank di CJN for im length of service, come wish am quick recovery and peaceful retirement.
Di NBA believe say wit di new Acting CJN, e go be opportunity to “reform” di judiciary plus “rebuild di almost disappearing confidence wey Nigerians get in am.”
Ibrahim Tanko Muhammad resignation
Justice Ibrahim Tanko Muhammad resign as di Chief Justice of Nigeria (CJN) according sources wey confam di tori to di BBC.
Na close aide of di judge confam say e tender im resignation on Sunday night.
Dis latest development dey follow some corruption allegations wey some Supreme Court judges drop against am. For one protest memo wey 14 Supreme Court judges sign, dem accuse Oga Muhammad say e no dey give justices dia legitimate entitlements.
- Afta Peter Obi controversy Father Mbaka tok sorry to Enugu Bishop
- Tems join TuFace, Burnaboy, odas to become Nigeria first female act to win BET awards
Di source wey no want make dem tok im name, say Judge Ibrahim Tanko Muhammad, no wan kontinu di drama ova di controversy and e add say Oga Muhammad don already drop instruction say make di next highest-ranking official for di Supreme Court take ova tins before dem appoint di permanent Chief Justice.
According to records wey dey ground, Justice Olukayode Ariwoola na di highest-ranking judge afta di resignation of Justice Ibrahim Muhammad.
President Muhammadu Buhari bin first swear in Justice Muhammad as di kontri Deputy Chief Justice for January 2019 afta di suspension of Chief Justice Walter Onnoghen sake of say im bin no declare im assets.
Den for July of di same year, na dem swear am im as di Chief Justice of Nigeria.
As e be so di Nigeria goment neva tok anytin on di mata of dis resignation.
Who be Justice Olukayode Ariwoola
Justice Olukayode Ariwoola na one of di Supreme Court Justice and na di next highest pesin among Nigeria Supreme Court Justice dem.
Dem born Justice Ariwoola on 22 August 1954.
Dem appoint am as Justice of di Supreme Court for 2011.
Between 2005 and 2011, im bin be Justice of di Court of Appeal afta dem change im level from dat of State High Court for Oyo state, southwest Nigeria.
Justice Ariwoola begin school for im hometown Iseyin, for 1959 wey im attend Local Authority Demonstration School.
Im come go Muslim Modern School for di same town between 1968 and 1969 before im go Ansar-Ud-Deen High School, Saki for Oyo North, Oyo State.
Im study law for University of Ife (now Obafemi Awolowo University), Ile Ife and graduate as lawyer for July, 1980.
For July 1981, dem call Ariwoola to Nigeria bar and im apply for Supreme Court of Nigeria as lawyer and Advocate soon afta.