Lawyer to di former Nigerian Deputy Senate President Ike Ekweremadu and and im wife Nwanneka Ekweremadu wey dey face accuse say dem conspire to arrange to take one child to UK for alleged organ harvesting don tell BBC say dem no dey tok about di mata for now.
“We no dey comment. Never, I no dey comment on case.” Na so Siobhain Egan tok.
On wia dem dey hold di senator and im wife, Egan also say dem no dey comment on dat.
Dis dey come as Uxbridge Magistrates Court on Thursday afternoon rule say make di two Nigerian nationals remain for custody till 7, July, 2022 for trial.
Prosecutor Damla Ayas tell di court say: “In respect of dis offence dem, di Attorney General approval dey required.“And di Crown require 14 days for dem to get am.” Ayas tok.
Authorities for UK arrest 60-year-old Ekweremadu and im 55-year-old wife afta investigation by di Metropolitan Police Specialist team.
Met Police bin tok for inside one statement wey dem share wit BBC Pidgin say:
“Beatrice Nwanneka Ekweremadu, 55 (10.9.66) of Nigeria dey charged wit conspiracy to arrange/facilitate travel of anoda pesin with a view to exploitation, namely organ harvesting.
Ike Ekweremadu, 60 (12.05.62) of Nigeria dey charged with conspiracy to arrange/facilitate travel of anoda pesin wit a view to exploitation, namely organ harvesting,” di statement tok.
Met Police say dem don remand di suspects for custody and dem go appear for Uxbridge Magistrates’ Court later today.
Dem launch di investigation afta detectives dey alerted to potential offences under modern slavery legislation in May 2022.
Di Met Police say dem don safeguard di child and dem dey work closely wit partners for more support.
Dem no give di gender of di child wey di suspects won harvest im organ.
“As criminal proceedings don dey go on, we no go provide further details,” di Met Police tok.
Who be Ike Ekweremadu?
Ike Ekweremadu na former Nigerian Deputy Senate President.
Di lawmaker na ogbonge politician for Nigeria and im don dey Senate since 2003.
Ekweremadu na from Enugu State and im serve as di Deputy Senate President for 6th, 7th and 8th Senate.
Di Senator hold both bachelor’s and master’s degree in law from di University of Nigeria and dem call am to bar in 1987.
Im also hold Doctor of Philosophy degree in law from di University of Abuja.
Di politician belong to di opposition People’s Democratic Party (PDP).
Ekweremadu bin get di ambition to contest for di 2023 governorship election for Enugu but im withdraw from di PDP primaries hours before di election.
Di politician tok say im bin make plans and develop strategies to transform di state but some pesins work against am.