PDP Primaries results: Governorship primary winner list

Winners don emerged as Peoples Democratic Party (PDP) conduct dia governorship primaries.

PDP primaries hold across Nigeria on Wednesday 25 May ahead of di general elections in 2023.

Rivers PDP governorship primaries and Delta State PDP governorship primaries stand out.

Some of di states wia delegates park go venue of di exercise include Oyo, Benue and Adamawa.

Odas na Delta, Kaduna, Taraba, Bauchi, Abia, Akwa Ibom among odas.

Officials of di Independent National Electoral Commission (INEC) monitor di exercise dem.

Security operatives also send dem to ensure say di primaries go smoothly.

Adamawa State PDP governorship candidate

Governor Umaru Fintiri of Adamawa State, wey wan extend im tenure in office by anoda term win.

Fintiri win 663 of a total of 668 votes with five odas declared void.

Oyo State PDP governorship candidate

Governor Seyi Makinde of Oyo State win di primaries wey happun for Lekan Salami Stadium in Ibadan.

Makinde score a total of 1,040 votes from Oyo delegates to defeat his sole opponent, Mr Hazeem Gbolarunmi.

Benue PDP governorship candidate

Speaker of Benue State House of Assembly, Titus Uba become di PDP candidate.

Uba score 731 votes to defeat his closest rival and current deputy governor of Benue, Benson Abounu, who score 81 votes.

Enugu State PDP governorship candidate

Former Commissioner for Finance in Enugu State, Peter Mbah, win di PDP governorship primary in the state.

Abia State PDP governorship candidate

Professor Eleazar Ikonne become PDP governorship candidate for Abia State

Ikonne, na former Vice-Chancellor of Abia State University.

Delta State PDP governorship candidate

Just like di situation in Benue, Speaker of di Delta State House of Assembly, Sheriff Oborevwori win.

Oborevwori score 597 votes out of 826 votes of delegates from di 25 LGAs to win 13 oda aspirants.

Olorogun David Edevbie come second with 113 votes while Delta South Senator, James Manager come third with 83 votes.

Sheriff Oborevwori from Osubi Town in Okpe local goment area and e dey represent Okpe State Constituency for di Delta State House of Assembly.

Rivers State PDP governorship candidate

Former Rivers State Accountant General, Fubara Siminialayi win di PDP governorship primaries.

Siminialayi score total of 721 votes to defeat im two closest rivals, Isaac Kamalu and George Kelly wey come second and third with 86 votes and 37 votes respectively.

Na total of 898 votes delegates from di 23 LGAs cast, with eight void votes na so di election committee chairman, Prof. Walter Mboto tok for di primaries wey 16 aspirants contest.

Siminialayi come from Opobo, a riverine community for Opobo/Nkoro local goment area.

Earlier dis month, di Economic and Financial Crimes Commission EFCC declare Fubara Siminialayi wanted along with three oda top state goment officials over alleged N117 billion fraud and dem still dey EFCC wanted list.

Akwa Ibom State PDP governorship candidate

For Akwa Ibom State, former commissioner for lands and water resources, Pastor Umo Bassey Eno win di governorship ticket of di PDP.

Pastor Umo Eno wey score a total of 993 votes to defeat 12 oda aspirants, come from Nsit Ubium LGA.

Di present Governor of Akwa Ibom State, Udom Emmanuel bin don select am as im successor wen e declare am for 30 January 2022.

Anoda PDP Governorship candidate dom come out of parallel primaries for Akwa Ibom State

Two-term member of di House of Representatives, Michael Enyong, emerge winner of a parallel primary wey dem conduct for Ewet Housing Estate, Uyo, di Akwa Ibom State capital.

Dem declare Enyong, wey dey represent Uyo Federal Constituency for di House of Representatives, winner of di parallel primary, for venue wey dey different from di one wia Pst. Umo Eno come out as winner.

Tori be say di lawmaker defeat oda aspirants with 2448 votes as di returning officer, Mr. I. D. Sunday declare followed by Pastor Umo Eno wey get 239 votes.

Enyong declaration dey come hours after dem declare Pst. Umo Eno, wey be Governor Udom Emmanuel tipped successor.

Na di PDP primary wey produce Pastor Umo Bassey Eno di Resident Electoral Commissioner for Akwa Ibom state, Mike Igini supervise.

Lagos State PDP governorship candidate

Olajide Adediran, wey dey popular for im Lagos4Lagos Movement win di PDP Govnernorship Primary for Lagos .

Adediran wey dey popularly known as Jandor score 679 votes to defeat David Vaughan wey poll 20 votes.

Four PDP aspirants including Olanrewaju Jim-Kamal, Adedeji Doherty, Ade Dosunmu and Gbadebo Rhodes-Vivour — withdraw from di race before di exercise begin.

Jigawa State PDP governorship candidate

Mustafa Lamido, son of Sule Lamido, former Jigawa govnor, win di PDP governorship primaries

Mustafa score 829 out of di 832 votes cast during di primary.

Gombe State PDP governorship candidate

In Gombe state, Jibrin Barde win di PDP governorship primary election.

Barde get 160 votes to defeat five oda aspirants – Jamil Gwamna (119 votes), Ali Gombe (17), Adamu Suleiman (18), Gimba Ya’u (one), and Babayo Ardo (13).

Nasarawa State PDP governorship candidate

David Ombugadu, a former member of house of representatives, win Nasarawa state PDP governorship primaries.

Ombugadu record 247 votes to defeat Nuhu Angbazo, wey score 203 votes.

Borno State PDP governorship candidate

Mohammed Jajari win as candidate of PDP in Borno state governorship primary.

Jajari bin score 487 votes to defeat Mohammed Imam, wey record 362 votes.

Kaduna State PDP governorship candidate

Isah Ashiru win PDP governorship primary election for Kaduna state.

Ashiru bin fly di PDP flag as candidate in 2019.

He score 414 votes to defeat im closest opponent, Sani Sidi wey score 260 votes.

Kwara State PDP governorship candidate

Yahman Abdullahi, a former member of house of representatives, win di PDP Governorship primaries in Kwara

Abdullahi score 518 out of 574 delegates votes.

Plateau State PDP governorship candidate

Caleb Mutfwang win PDP governorship primaries in Plateau state.

Mutfwang, a former council chairman of Mangu LGA score 252 votes to defeat 13 odas.

Bauchi State PDP governorship candidate

Ibrahim Kassim, win di PDP governorship ticket unopposed for Bauchi State.

Kassim wey be former secretary to Bauchi state government, secured 655 votes.

Sokoto State PDP governorship candidate

Sa’idu Umar, former secretary to Sokoto state goment, win PDP ticket to contest di governorship election in 2023.

Umar win unchallenged after four top contestants withdraw from the race.

We still dey put eye for dis tori, just dey refresh di page for more update…