Winner of Nigerian Idol season 7: Progress beat Zadok to become Nigerian Idol TV show winner

Progress Chukwuyem na di winner of Nigerian Idol Season 7.

Dem announce di 21 years-old Delta born am as winner of di edition on Sunday.

Progress beat Zadok wey emerge as di runner-up for di season singing competition.

As di winner, e go collect cash prize 30 million naira (about $73,000) , one brand new SUV plus recording deal among oda things.

For one recent interview, Progress tok say di pesin wey go dey most proud of am na im late mama ”becos dis na her prayer point.

“I dey happy. I no go let you down. Thank you for voting for me.” Progress tok shortly after dem announce am di winner.

Progress Biography

Dem born Progress for Warri Delta state south-south Nigeria but e be indigene of Ika south local goment area of di state.

E be 21 years old.

Progress be songwriter, singer, performer plus music minister according to wetin dey im bio for im official Instagram page wey get over 60,000 followers.

E bin know day e wan be singer afta e attend one musical competition we e dey 16 years old.

Im inspiration na one ogbonge American musician, Jonathan McReynolds

Past winners:

Season 1: Onyekachi Gilbert Elizabeth

Season 2: Mercy Chinwo

Season 3: Moses Obi Adigwe

Season 4: Zibili Evelyn Ibhade

Season 5: Kunle Ogunrombi

Season 6: Kingdom Kroseide