Man United vs Tottenham highlights: Cristiano Ronaldo score hat-trick to help United defeat Spurs 3-2

Ronaldo

Getty Images

Manchester United forward Cristiano Ronaldo score hat-trick to help di Red Devils overcome determined Tottenham 3-2 for Old Trafford.

Di Portuguese wey just return from injury produce star performance as im first open di scoring wit thunderbolt shot for first half. Im score two more for second half afta Spurs equalise two times.

Wit those three goals Ronaldo make history as im become di player to score di highest goal for football history according to Fifa – 807.

Spurs go feel disappointment to leave Old Trafford wit no point as dem bin battle hard and even equalise twice.

Afta Ronaldo open di scoring for di 21st minute, Harry Kane bin score from di penalty spot to draw im side livel but Ronaldo tap in Sancho lay off to restore United lead just before di break.

Di North London club pressure for di second half force Maguire to redirect Reguilon cross into im own net for 2-2.

But once again as im don do so many times before for im career, Ronaldo settle di match wit header from Telles cornerkick cross.

Di win see United climb into fourth place wit 50 points above Arsenal wey get four outstanding games.

While Spurs remain for fifth with 47 points. Dem too get two outstanding matches to play.

How di match go

Second half

46 mins: Ronaldo get di second half underway.

48 mins – Kulusevski try to find Reguilon wit good diagonal cross inside United box, Dalot clear di ball go out for corner. Di cornerkick result to nothing as United clear di ball.

51 mins – Pogba bin need attention as im bin feel contact from Romero and Bentancur, referee Jon Moss say play on. Di United man bin no dey happy.

60 mins – Spurs don dey press Man United but some of dia passes and crosses dey overhit as e no meet any player wey wear white shirt.

61 mins – Good link up play for Spurs but Son shoot just wide. Dejan Kulusevski find di South Korean wit cute pass inside di United area, wit defenders around am Son shot go away from di target.

66 mins – Ronaldo test di palms of Lloris wit shot from di right hand side, di Spurs keeper palm di ball away.

68 mins – Substitution for United. Elanga come ON for Rashford.

72 mins – Oh oh, Harry Maguire don score own goal to help Spurs equalise. Di United defender attempt to stop Reguilon cross see di ball enta im own net. Man United 2-2 Tottenham.

76 mins – Hugo Lloris save Ronaldo shot to deny am from scoring hattrick. Spurs clear di resulting corner.

78 mins – Substitution for Spurs: Lucas Moura don replace Kulusevski while United coach Rangnick don send on Cavani to replace Matic.

82 mins – Ororo! Ronaldo score im third for dis match to give United di lead. Man United 3-2 Tottenham.

83 mins – Immediately im score dem sub am. Ronaldo OFF, Lindelof ON.

85 mins – Yellow card for Pogba.

87mins – Substitutions for Spurs: Bergwijn and Winks ON, Davies and Bentancur.

90 mins – Referee Jon Moss don add four minutes injury time.

First half

1 min – Tottenham take di first kick of di game as di match don start.

4 mins – Son try to meet looped through ball to go in on goal but De Gea rush out to clear di ball.

9 mins – Shout for handball! Ronaldo shot hit Dier for hand and di Portuguese bin dey ask di ref to signal for Penalty but di ref say no penalty.

11 mins – Replays show say di ball hit Dier hand but di defender hands bin dey for im side.

Cristiano Ronaldo scores for Man Utd

Getty Images

13 mins – Ronaldo!!! From outside di box, Cristiano Ronaldo give United di lead. Man United 1-0 Tottenham

16 mins – Pogba try to do im own version of di Ronaldo goal but im placed shot go wide.

18 mins – Straight from dat attempt, Spurs launch attack for di oda end and from di attack dem equalise. Wait, linesman don flag for offside as Davies wey score di goal bin don go off before im receive di pass.

As e be, di score still be: Man Unites 1-0 Tottenham.

23 mins – Ronaldo try to meet Alex Telles cross, im glancing header go wide of di post as im no connect well wit di cross.

26 mins – Chance for Tottenham! Diego Dalot clear Dier header off di line. Di United right back just dey for di right place wen di Englishman nod Bentacur headed pass goalwards.

30 mins – Yellow card for Dier becos im stop Ronaldo from starting quick counter by United.

Spurs don wake up since dat United goal as na dem dey control much of di ball possession.

32 mins – Matic foul Kane just outside di United penalty area. Di referee bin blow advantage but later call di ball back. Dier na im wan take di freekick. E hit di wall.

34 mins – Penalty for Spurs! Dalot hand block Kulusevski attempted cross into United box. Yellow card for Fred.

35 mins – Harry Kane equalise from di penalty spot. De Gea go di right way but di shot bin dey too strong for am.

Man United 1-1 Tottenham

38 mins – 2-1 United! Ronaldo again wit im second goal of di match.

Excellent response by di hosts as Jadon Sancho break clear of di defence before im square to Cristiano Ronaldo to slot in from close range.

VAR bin check if Sancho dey offside but no im dey on on and Manchester United lead again.

41 mins – 806 goals na im Ronaldo don score for im career. Nobody else don score dat number according to Fifa.

42 mins: Harry Kane shoot from distance and e deflect to give Tottenham corner. Di visitors get di chance to level again before half time. But di corner come to nothing.

45 mins – Afta two mins added time, referee don blow im whistle for halftime. Man United 2-1 Tottenham.

Team news

Man Utd XI: De Gea, Maguire, Pogba, Ronaldo, Rashford, Fred, Varane, Dalot, Sancho, Telles, Matic.

Tottenham XI: Lloris, Doherty, Reguilon, Romero, Hojbjerg, Son, Kane, Dier, Kulusevski, Bentancur, Davies.