Regina King: Ian Alexander Jr pikin of Oscar winning actor die days afta social media post – Dis na wetin we know

Regina King son: Ian Alexander Jr only son of Regina King

Getty Images

Ian Alexander Jr, di only pikin of Oscar-winning actor and director Regina King, don die for di age of 26 years old.

Local tori pipo quote statement from Regina King wey her representative release on her behalf afta di death of her son;

“Our family dey devastated for di deepest level by di loss of Ian. E be such a bright light wey care so deeply about di happiness of odas,”

“Our family ask for respectful consideration during dis private time,” di statement tok.

Tori pipo CNN dey report say Regina King representative confam give dem say e die by suicide.

Days before Ian Alexander Jr death, e bin post for im Twitter page on 15 January say; “I no tink instagram dey healthy for me.”

Just last week, e mama, Regina use her Instagram to advise her followers to support her son new single, Green Eyes.

Last year, Ian Alexander Jr bin write heartfelt tribute to e mama for her 50th birthday.

“To have you as my mother na di greatest gift I fit ask for. To be all wey you be and always still get di time to be there, love and support me unconditionally dey truly remarkable,” e write for one Instagram post last year.

Regina King son: Ian Alexander Jr only son of Regina King

Getty Images

Late Ian Alexander Jr na Regina King only child, wey she born for her ex-husband, record producer Ian Alexander Sr.

E be musician and DJ wey dey perform under di name “Desduné,” according to im Instagram page.

Alexander bin release one new single, “Green Eyes,” for 7 January and bin get one performance wey suppose happun for Los Angeles later dis month.

Tributes and Condolences from pipo

Celebrity friends of Regina King don share dia messages of condolence and tribute afta di death of her son.

Singer Missy Elliott write say: ‘PRAYERS for Regina King family & Ian Alexander Sr. family. Dear LORD give dem STRENGTH during dis time.’

Singer, Janet Jackson post photo of Ian Alexander Jr and im mama for Instagram and write say;

“I dey so sorry to hear about Ian. Please know say I dey here for you Regina King. Sending all my love, prayers and condolences.”

Award winning Comedian, Loni Love tweet ‘Love you Regina King’ and add say;

‘I meet Ian for Sherri Shepherd birthday bash.. e take care of di event. Cook and serve all the food and e dey delicious!!!! Such a sweet and talented young man… Rest In Peace.’

Real Housewives of Atlanta, Cynthia Bailey also share photo of Ian and im mama for Instagram and write say:

‘”HEARTBREAKING. Sending my sincerest and deepest condolences to Regina King and her family. My prayers dey with you.’