Gambia vs Mali: Musa Barrow late penalty help Gambia collect one point against Mali

Musa Barrow

Getty Images

Late penalty from Musa Barrow ensure Gambia collect one point against Mali for match wey video assistant referee take centre stage.

Di Bologna forward goal for di 90th minute deny di Malians take home all three points afta dem too score from penalty wey VAR award as di match end 1-1.

Ibrahima Kone bin don open di scoring for di 79th minute from di penalty spot afta Ebou Adams bin push Yves Bissouma inside di box.

Both teams get four points each for Group F and go need play dia last group match before dem go fit know if dem follow qualify for di next round of di Afcon.

Dia four points fit see dem qualify as one of di four best losers for di tournament.

Late drama by VAR

Mali midfielder Yves Bissouma (right) controls the ball next to Gambia forward Assan Ceesay

Getty Images

Mali control much of di first half but Di Gambia bin come close to break di deadlock, as Barrow hit di crossbar wit powerful free-kick from over 30 yards out and Ablie Jallow curl one shot go hit right-hand bar too as di ball bin don beat Mali keeper Ibrahim Mounkoro.

For inside hot conditions, Scorpions keeper Modou Jobe bravely deny Adama Noss Traore and tip over Amadou Haidara curling free-kick for di second half, while Bissouma send im shot over.

And, after referee rule say Adams stop Bissouma from connecting wit Adama Malouda Traore cut-back, Kone score im second goal of di tournament – afta im also net Mali winner against Tunisia from di spot.

Di Sarpsborg striker now get 10 goals for eight internationals for di Eagles, wey don reach Africa play-offs for di 2022 World Cup.

But di intervention from VAR no end dia as Ebrima Colley looped ball hit Bissouma arm for close range and referee Samir Guezzaz point to di spot once more after im check im monitor.

Bologna forward Barrow side-foot di ball into di right-hand side of di net to spark celebrations for The Gambia.

Di Scorpions go face Tunisia for dia final Group F game on Thursday, while Mali go take on Mauritania (both 19:00 GMT).