Governor Adebayor Alao Akala: Former Oyo state govnor Alao Akala don die

Di former govnor of Oyo State, Christopher Alao Akala don die at di age of 71.

E no dey clear wetin be di cause of im death.

Di late Akala bin serve as govnor of Oyo State for southwest Nigeria from 2007 to 2011.

Di current govnor of Oyo State, Seyi Makinde also direct flags across di state to fly at half-mast in honour of di former govnor .

“His Excellency go dey remembered for im contributions to di development of Oyo State as govnor,” im tok.

“We just lost or leader”, dis na wetin fellow politician Oloye Akin Alabi post for im twitter page as im mourn di death of di former govnor.

Tins to sabi about Alao Akala

Alao-Akala come from Ogbomoso in the Ogbomoso North Local Government Area of Oyo State.

Im become di Deputy Governor of Oyo State from May 2003 to January 2006 before e later become di Executive Governor of Oyo State for 2007, till im comot from office for May 2011 under di People’s Democratic party, PDP.

For 2014, oga Akala later join di Labour party for Oyo state sake of wetin im say na internal irregularities for im former party.

For 2015 general elections Adebayo Alao-Akala bin contest as di gubernatorial flagbearer of di Labour party for Oyo State but im no win di election.

Im also contest to be govnor of di state again for 2019 but dis time under ADP party.

Dem born am for June 3, 1950.