Nigeria government declare bandits as terrorists – See wetin fit hapun next

Federal Goment of Nigeria don officially declare bandit groups wey dey operate for any parts of di kontri as terrorists.

Di declaration dey inside di Federal Goment Gazette wey ban and forbid dia existence and stop any pesin or group of pesins from participating inside activities of any of di groups.

Dem release di official Gazette wey di Attorney General of di Federation and Minister of Justice, Abubakar Malami, sign on Wednesday 5th January, 2022.

Dis one dey come afta di Federal High Court for Abuja, Nigeria ruling wey declare bandit groups as terrorists.

For inside di ruling wey Justice Taiwo Taiwo deliver on Friday, 27, November 2021, di court say di activities of Yan Bindiga and Yan Ta’adda bandit groups, na acts of terrorism.

Di ruling follow di ex parte motion wey di Federal Goment of Nigeria bin file through di Federal Ministry of Justice.

Wetin di Gazzette tok?

Di Gazzette say di activities of Yan Bindiga Group, Yan Ta’adda Group and oda similar group for Nigeria dey declared as terrorism and dey illegal for any part of Nigeria especially for di North West and North Central regions of di kontri dey proscribed according to sections 1 and 2 of di Terrorism (Prevention) Act, 2011.

“Consequently, di general public dey hereby warned say any pesin or group of pesins wey dey participate in any manner whatsoever in any form of activities wey involve or concern di prosecution of di collective intentions or odawise of di groups wey dey referred to for inside paragraph 1 of dis notice go dey violate di provisions of di Terrorism (Prevention) Proscription Order Notice, 2021.

Wetin fit hapun next?

Security Sabi pesin, Rtd Col Hassan Stan-Labo say goment declaring bandit for di kontri na game changer for di fight against di bandit.

E say by dis pronouncement, di military don get authorization to use lethal weapon like A-29 Super Tucano fighter jets wey dem acquire from di United States last year.

E further explain say di US goment bin place some restriction on how Nigeria go use di fighter jet sake of concerns of human rights abuse and sake of dis restriction, di military no fit use di jet to bomb di hideout of di bandits like dem dey for north east but now wey dem don declare dem as terrorist, di security go now go very tough on di bandits.

Di Super Tucano na dual-pilot turboprop aircraft wey dem build as workhorse combat air platform – e dey equipped for intelligence, surveillance, and reconnaissance (ISR) and for precision air-to-ground strike missions.

Nigeria get 12 of dis aircraft but oga Stan-Labo say make security no treat di bandit wit kid glove and dat make dem bombard dem and finish dem for Naija within di coming months.

Bandits don dey operate for north west and north central Nigeria. Dem dey kidnap for ransom and attack villages and kill- kill pipo.

Sake of dis, some govnors for north west like di Kaduna state Govnor, Nasir El-rufai bin call make di military bomb dia base.

Sake of di restriction, di military engagement bin no dey hard but wit dis development, experts believe Nigeria fit win di battle against di bandits.

Popular Islamic Cleric Dr Ahmad Gumi

Sheik Gumi na popular Islamic Cleric get controversial views about how goment suppose tackle herdsmen banditry

Who be di bandits?

Di armed bandits wey dey mostly operate out of abandoned forest reserves dey terrorise and attack communities for di kontri north-west region.

Dem be di latest groups to join Nigeria kidnap for ransom industry.

In di last ten years, more dan 8,000 pipo don die in di states of Kebbi, Sokoto, Niger and Zamfara, according to di International Crisis Group.

Di attacks fit dey traced to years of competition over resources between ethnic Fulani herders and farming communities.

Meanwhile, controversial Islamic cleric Sheikh Gumi bin don condemn di Federal High Court ruling wey grant di Federal Goment of Nigeria request to name bandits as terrorists for di kontri say e no go get head.

“Declaring di herdsmen banditry as terrorists na just a decision wey dem take for political purpose. E no go get any practical value because even before di declaration, dem bin dey fight and treat dem as terrorists. So na just nomenclature wey I believe say no go change di dynamics on ground.

If you fit remember, IPOB, dem also declare am as terrorist organisation, di declaration even dey backed by di order of di Court but as you fit see, even di international community no recognize FG declaration of IPOB. So e don fail to dey effective or to achieve di desired results.” E tok.