Baba Suwe burial: Babatunde Omidina don dey buried for im house for Ikorodu – See how e hapun

Ogbonge nollywood actor Babatunde Omidina, wey pipo sabi as Baba Suwe don make im final journey to im final resting place today, 25, November, 2021.

Di burial hapun for im house for Ikorodu, Lagos state, south west Nigeria.

Sola Omidina, Baba Suwe son bin confam Baba Suwe death to BBC Pidgin on Monday, 22,November, 2021, say di Nigerian comedian die around afternoon dat day.

Im bin tell BBC Pidgin say:

“Dem reach out to me immediately e happun, but im (Baba Suwe) bin sick small”.

Baba Suwe bin dey 63-year-old before e die.

Since den, pipo bin don dey gada small-small for di late actor family house to condole with di family. Baba Suwe house dey very popular for Ikorodu area of Lagos, as pipo dey see am as mentor.

Baba Suwe house on im burial day

BBC
Baba Suwe house on im burial day

How Baba Suwe burial hapun

Pipo gada for Baba Suwe house for Ewu Elepe, Ijede area of Ikorodu to attend di b urial as early as 9:00am in di morning.

Dem bury Baba Suwe around 11:00am.

Dem dey carry Baba Suwe casket inside im house

BBC
Dem dey carry Baba Suwe casket inside im house
Actor Jide Kosoko arrive Baba Suwe burial

BBC
Actor Jide Kosoko arrive Baba Suwe burial

Baba Suwe last moments

Baba Suwe son Omidina Adebowale Jr wey bin dey with im papa wen e die say im papa na very strong man. E say hm be go gym wen im mama call am say im papa no dey breathe well.

“Wen I reach house, I enta im room to tok to am and e try to respond but e no fit. My papa na very strong man. E no wan leave us but death dey more powerful. E bin dey on first drip wen I reach house, so dem give am second drip before I komot from im room to wash my kits.

“Wen I dey wash my kits, my mama take me to my room and say my papa don die. Shock hold me for body and na why I post di video on my WhatsApp status. Di video bin go viral witihn five minutes wey I post am,” Junior tok.

Baba Suwe burial

BBC
Pipo dey land Baba Suwe burial

Who be Baba Suwe?

Dem born Babatunde Omidina aka Baba Suwe on August 22, 1958, for Inabere Street for Lagos Island.

But di legendary actor come from Ikorodu local goment area of Lagos.

E marry e wife, Omoladun Omidina wey also be actor for 1995 and she die for September, 2009.

Di popular actor bin attend Jamaitul Islamial Primary School for Lagos, and Children Boarding School, Osogbo.

After im boarding school, Baba Suwe bin get im West African School Certificate for Ifeoluwa Grammar School for Osogbo, Osun State, southwest Nigeria.

Baba Suwe begin acting career for 1971 and e bin act for both English and Yoruba language films.

Di veteran Nollywood comedian dey often play di role of confuse servant or security guard.

E become popular afta e feature in one movie titled, Omolasan.

Im become more popular afta e act for Iru Esin wey Olaiya Igwe produce for 1997.

‘Cocaine controversy’

Di National Drug Law Enforcement Agency (NDLEA) bin arrest Baba Suwe afta dem accuse am of trafficking cocaine for 2011.

As di agency put am for custody sake of say dem want make e excrete di cocaine wey dem suspect say e dey im stomach, nothing come out of Baba Suwe belle.

Di agency chop blame ontop di case and court come judge say make dem pay Baba Suwe more than $155,000 as compensation and apologise to am.

More fotos from Baba Suwe burial

Pesin dey sign condolence register

BBC
Pesin dey sign condolence register
Band dey play for Baba Suwe burial

BBC
Band dey play for Baba Suwe burial
Baba Suwe casket as dem wan put am for ground

BBC