Baba Suwe dead: Babatunde Omidina death, im son tok how veteran Nigerian comedian die

Nigerian comedian Babatunde Omidina popularly known as Baba Suwe don die.

Im pikin Sola Omidina confirm Baba Suwe death to BBC Pidgin.

Omidina also write for im instagram page say;

“Dis na to announce di sudden death of my father Mr Babatunde Omidina. Di legend and rare gem ” Babasuwe ” 11/22/21

Baba Suwe pikin say di Nigerian comedian die around afternoon on Monday.

“Dem reach out to me immediately e happun, but im (Baba Suwe) bin sick small”.

Babatunde Omidina aka Baba Suwe bin dey 63-year-old before e die.

Im son say e bin dey United States wen im hear di news of im papa death for Nigeria.

Sola Omidina add say close relatives bin dey close to di comedian for im last moment.

E describe e papa as a very wonderful pesin and good father.

“E be good father as e entertain di world, e entertain me as a son as well, because wen I dey watch am for screen, I no dey see am as my fada, I dey see as a comedian.”

“E dey funny on screen and funny off di screen. E be di best thing wey don happy to me.”

Dem go announce Baba Suwe burial arrangement later, di son conclude.

Rumors about di death of Baba Suwe don bin spread two times before; for 2019 and 2020.

Who be Baba Suwe?

Baba Suwe na famous comedian for Nigeria film industry, Nollywood.

E dey act for both English and Yoruba language films.

E real name na Babatunde Omidina and dem born am August 22, 1958.

Baba Suwe from Igbogbo for Ikorudo for Lagos mainland, inside Nigeria commercial capital.

Di comedian do im primary education for Jamaitul Islamial Primary School inside Lagos and Children Boarding School, Osogbo.

E later obtain im West African School Certificate from Ifeoluwa Grammar School inside Osogbo, Osun State capital, southwestern Nigeria.

Baba Suwe begin acting for 1971 but become popular afta e featured for one movie titled, Omolasan.

Di commedian become more popular afta e feature for Iru Esin, wey Olaiya Igwe produce for 1997.

E dey act for both English and Yoruba language films and often dey play di role of confused servant or security guard.

Di comic actor don feature and produced several Nigerian movies like;

Baba Jaiye jaiye, one movie wey feature Funke Akindele and Femi Adebayo, di son of actor Adebayo Salami.

Baba Suwe and NDLEA Saga

For 2011, National Drug Law Enforcement Agency bin arrest Baba Suwe ontop suspicion of drug trafficking.

Dis na afta one body scanner for Lagos airport identify suspected drugs for im stomach.

Authorities bin stop am for di airport as e dey about to board one flight but dem later no see any drugs for e body.

Afta more than three weeks Baba Suwe spend for detention, and 25 bowel movements, officials from NDLEA admit say e no excrete (poo-out) any drugs.

Later dat year, one judge for High Court inside Lagos come give judgment make dem pay Babab Suwe more than $155,000 as compensation.

Justice Yetunde Idowu say di detention of Baba Suwe na ‘flagrant’ abuse and infringement of e rights.

E say NDLEA don fail to account for di nine days wey Baba Suwe dey for detention before dem “rush” to Federal High Court to get order to continue to detain am.

Court also tell NDLEA to publish one public apology “on conspicuous pages” – dat is noticeable page dem for two national newspapers.

Dat time, NDLEA Director of Public Prosecutions and Legal Services Femi Oloruntoba tok say di agency go appeal.

E news of baba Suwe arrest and detention by NDLEA really shock fans welll before court judge say e dey innocent.