Lai Mohammed: End Sars panel report wey call Lekki toll gate shooting ‘massacre’ na fake – minister of information

Lai Mohammed


Nigeria goment don reject di Judicial panel of inquiry report ontop di End Sars mata and Lekki toll gate shooting for Lagos.

Minister of Information and Culture Lai Mohammed tok give tori pipo for Abuja where e react to information wey dey inside some leaked documents – report of di panel wey chook eye inside cases of police brutality, Special Anti-Robbery Squad and di incident for Lekki toll gate wey turn violent.

“We reject di notion say our soldiers and policemen massacre innocent Nigerians for Lekki on Oct. 20th 2020. Dat conclusion no dey supported by di weight of available evidence.

Indictment for murder na very serious issue wey we no fit base on allegations and corroborations, as di panel do. Such allegations must dey proved beyond a reasonable doubt. Di report wey dey circulate dey calculated to embarrass di federal goment and im agencies without evidence.”

Federal goment never ever condone di abuse of rights of Nigerians by security agencies under any form, dats why dem disband SARS and encourage states to set up di panels to investigate reports of human rights abuses wey SARS personnel allegedly commit.” E tok.

Di reaction dey come from federal goment afta tori say di final document of di Lagos state End SARS panel, wey torchlight police brutality and di Lekki toll-gate End Sars incident, wey lead to violence across di state leak. Di leaked documents say ‘massacre’ hapun for Lekki toll-gate.

Lagos state goment bin say di panel findings go dey released to di public afta di four-man committee dem set up to look through di document come up with wit white paper in line wit di tribunal law.

Wetin else Lai Mohammed tok?

Lai Mohammed say:

  • Di report no consider di testimony of di ballistic experts dem
  • Di panel contradict imself by saying dat na nine person die of gun wounds for Lekki afta e bin don agree to di forensic report by Prof. John Obafunwa wey reveal say di post-mortem wey dem do, na only three deadi bodi come from lekki and na only one die of gun injury
  • E say e dey shock say di panel agree to a video testimoni of a man wey say e count 11 deadi bodi. How come di man wey di battle for im life, get eye to count deadi body, e ask
  • E say di panel report claim say truck wit brushes go clean up Lekki toll gate on di 21st of October and pick up all di bullet shells and clean di blood so dat evidence no go dey but still find bullet casing wen dem visit di area on di 30th of October.
  • E say di panel dey silent on top di family of those wey die and dat dem dey fear to come out come testify – and dat even goats get owner and dat till date, no family of anybody wey die don show. E say how goment go pay compensation to dem wen dem no get house address or identities.
  • E further yan say one man wey testify say e see di deadi bodi of im broda, im name come show for di panel diseased pesin list
  • E claim say why di panel dey forced to refer to wetin happun for Lekki as massacre in context and dat massacre na massacre and dat wetin be massacre in context?
  • Di panel no chook mouth at all on top di military and police pipo dem wey die during di Endsars protest and di police station wey dem burn – say di panel no consider dem as human beings?
  • E also say di report no also make any recommendation on top di innocent pipo wey lose dia businesses for Lagos during di Endsars protest and dat di way di panel take rush di mata, e be like say dem just dey concernED to look for evidence to support dia conclusion say massacre happun.
Endsars protest

Getty Images

Wetin dey di leaked document?

Di End Sars judicial panel report wey leak say Nigerian army knowingly open fire on unarmed protesters for Lekki tollgate on October 20, 2020 and dem shoot both blank and live bullets dia, but dem try to cover am up.

Di report list names of 48 casualties among which eleven don die, four dey miss and fit don die.

Di report also show say police continue di bad job afta army shoot finish and comot from di area. E say police try clean up di area and remove bullets wey fall for ground.

Eyewitnesses tok say trucks pack di deadibodi cum try to further clean up di area.

Nigerian army bin don tok say dem no shoot live bullets for Lekki tollgate during di protest wey mark her one year anniversary last month.

Di panel recommend make goment change name of Lekki tollgate to EndSars tollgate and designate toll free day for every October 20 to rememba wetin happun dia.

Nigeria goment bin mandate di setting up of panels to chook eye into di mata of police and SARS brutality across di kontri in response to demand by EndSars protesters.

Di incident for Lekki toll gate bin make goment extend di mandate of di Lagos panel to also chook eye and come up wit dia findings as to wetin true-true hapun on dat day October 20, 2020.

EndSars protest na di biggest movement against police brutality wey don ever happun for di kontri.