Chinwentala Agu don finally dey released from Nigeria secret police – DSS custody.
Na di Actors Guild of Nigeria confam im release on Tuesday evening.
BBC Pidgin bin confam say di Department of State Security bin transfer di Nollywood actor to Abuja.
Why dem arrest Oga Agu
Nollywood actor Chiwetalu Agu bin chop arrest last week sake of allegation say im wear one outfit wey carry Biafra flag.
One viral video for social media wey BBC Pidgin see bin show as some military personnel gbab di actor wey bin dey inside Onitsha.
But di veteran actor bin explain give army wetin im bin dey do before dem arrest am.
“I bin dey buy bread, #10,000 own and dey share am. No campaign, no nothing. No demonstration no carrying pipo along.”
Dat one na afta tori break on Thursday say army arrest di actor wey wear attire made up of di Biafra flag.
Who be Chiwetalu Agu
Chiwetalu Agu wey dey popularly known as Ichie Ogwu na ogbonge Nollywood actor and comedian.
Di actor come from Enugu, South-East Nigeria and e don begin acting long before di coming of Nollywood.
E feature for di Nigerian Television Authority Channel 8 Enugu’s Ikoro.
Chiwetalu Agu also feature for ETV Channel 50 now ESBS for Baby Come Now and Ripples wey Zeb Ejiro produce.
Di Nigerian actor don feature for plenti movies like Taboo, where e play di role of Ichie Ogwu Wedding Party 2
Agu dey popular for im humor and invention of customized phrases and slangs for movies wey dey make am fun to watch.
E be one of di most outstanding comic actors for di kontri.
Di actor na all rounder for im acting role, e also dey know to shift from comic role to wicked roles.
Some of Chiwetalu Agu funny exclamations for Movies include; Ovoko!, Ekwensu romance a’mami water!, Etelu ugba etelu ose!, odas.