Resident doctors strike in Nigeria: Court rule say doctors NARD end dia strike

Latest news on resident doctors strike be say Justice Bashar Attahiru Alkali of di National Industrial Court don rule say make all di National Association of Resident Doctors NARD end their strike and return to work immediately.

Dem say make di strike end pending di determination of di substantive suit.

Di strike action of di Nigerian Resident Doctors (NARD) don cause major gbege on medical services in gomment hospitals across di kontri .

Wetin Judge rule

Justice Bashar tok say no amount of money fit bring back di lives of pipo wey don die especially as Nigeria still dey battle wit di 3rd wave of Covid-19.

Im add say di ruling dey in di interest of common Nigerians wey no fit access medical health care abroad.

Lawyers Responses

Di National Industrial Court

BBC

Lawyer to di federal goment (Ministry of Labour and Employment) Tochukwu Maduka SAN, tok say di ruling na win-win for all, especially as all di avenues for negotiations no work.

Di lawyer wey represent resident doctors, Femi Aborisade tok say dem no go disobey di court ruling, but dem go appeal di ruling.

Im add say even as NARD go return to work dem go still dey negotiate wit goment and still look into oda avenues to go about dia case.

Di National Association of Resident Doctors begin dia Nationwide strike since August 2, 2021 as dem dey demand for beta welfare, increment of hazard allowance among oda tins.

Na goment cari di doctors go Industrial Court, sake of di no work no pay clause, wey goment bin tok, as di Doctors no gree call off di strike and all negotiation avenues fail.