Femi Fani-Kayode: Buhari receive FFK to APC – See wetin di former minister don tok about di party befor-befor

Nigeria former Minister of Aviation, Femi Fani-Kayode, don officially join di ruling All Progressives Congress party.

Di chairman of Caretaker Committee of APC, and governor of Yobe State, Mai Mala Buni on Thursday September 16 present am to President, Muhammadu Buhari for di Presidential Villa, Abuja.

Dis announcement dey come months afta him bin visit some APC governors.

“Today for State House, Abuja: Somebody come and join APC. And di President wey get big heart receive am. Because dat na Buhari for you,” na so presidential aide, Tolu Ogunlesi tok.

Meanwhile di former chieftain of Peoples Democratic Party say “di Spirit of God” na im lead him to make di decision to join di ruling party.

Di former minister say him go assist to build unity for di kontri.

Sometimes dis year, di former minister bin deny news say e join di APC afta im pictures wit some progressive govnors show for social media.

See interesting quotes from Femi Fani-Kayode about APC

Before Oga Femi Fani-Kayode bin port go APC him na strong critic of dis goment and di ruling APC party.

See some of di tins im don tok about di party before.

See how kontri pipo react to FFK defection to APC

Plenti Nigerians don dey tok dia minds about FFK defection to di APC.

Why many dey wonder wetin motivate di former minister to join di party wey e dey always criticise, odas dey ask who go comot di opposition PDP next.

Buhari receive FFK to APC- See wetin e don tok about di party befor-befor

Who be Femi Fani-Kayode?

Femi Fani-Kayode na 59 year old Nigerian politician, essayist, poet and lawyer. Fani-Kayode don comot PDP two times in di past to join APC.

Fani-Kayode be Special Assistant (Public Affairs) to President Olusegun Obasanjo from July 2003 until June 2006.

E collect anoda appointment as Minister of Culture and Tourism of Nigeria from 22 June to 7 November 2006 and as Minister of Aviation from 7 November 2006 to 29 May 2007.