Muhammadu Buhari: Yoruba Nation, IPOB gatz behave for United Nations General Assembly – Nigeria Presidency

Muhammadu Buhari office say Yoruba Nation, IPOB gatz behave for United Nations General Assembly.

Dis na as Nigerians wey want Yoruba Nation and Indigenous People of Biafra among oda activists don begin protest for United Nations Headquarters in New York.

Di president of Nigeria dey scheduled to address United Nations General Assembly on 24 September, 2021.

And Yoruba Nation, Biafra activists don vow to protest on dat day.

Sake of dis concern, di office of President Buhari alias Nigeria Presidency don cut eye give dis agitators.

Garba Shehu, di Senior Special Assistant to President Buhari dey even appeal to media to focus on core issues as president Buhari travel to di United Nations.

But e dey normal for Nigerian diaspora groups to use United Nations General Assembly – wey be di world largest platform – to draw attention to dia cause.

Why President Buhari dey concerned about Yoruba Nation, IPOB for UNGA?

E dey however shocking, to see “Yoruba Nation” advocates on Tuesday 14 September dey do padi-padi wit Indigenous People of Biafra [IPOB]. Shehu tok for statement on Wednesday.

IPOB na designated terrorist organisation. E now don publicly reveal a 50,000 strong paramilitary organisation. Buhari spokesman add.

Nigeria Presidency say IPOB dey regularly murder security services and innocent civilians, with serious picture of violent attacks dis year.

And dem dey currently attempt to hold Nigerian states hostage with orders to stay at home under threat of terror. Di statement add.

Buhari office say without doubt, Nigerians and di entire world go judge Yoruba Nation by di company [referring to IPOB in dis case] dem dey keep.

No one go take Yoruba Nation seriously if dem continue to associate wit IPOB. President Buhari tok through im spokesman.

Yoruba Nation cooperation wit IPOB be worrying development, once dem join togeda e go increase violent rallies inside Nigeria. Nigeria Presidency tok.

Actions and associations speak louder than words. Yoruba Nation tok of human rights promotion must therefore be ignored. Garba Shehu conclude

Meanwhile, President Buhari office say Nigerian goment go continue e work at di UN- to fight against corruption and illicit financial flows, and international cooperation.

Only through di 2030 Agenda on Sustainable Development we fit secure a prosperous future for Nigeria. E add.

BBC
Yoruba nation protesters for Ojota, Lagos

Yoruba Nation rally – Background

Rallies to promote di ‘Yoruba Nation’ campaign don happun for states across di south west region of Nigeria.

Organizers dey call for self determination of di Yoruba pipo wey mainly occupy southwest Nigeria.

Ilana Omo Oodua na di umbrella body of Yoruba self-determination groups.

BBC Pidgin Observe say for recent months di rallies dey happun every oda Saturday.

On 15 May, hundreds of pipo wey dey clamour for Yoruba nation gada to do peaceful rally for Osun State, southwest of Nigeria.

For April, police scata Yoruba Nation rally wey dem bin wan do for Ibadan, Oyo State capital.

Di Yoruba Nation ginger begin loud more recently sake of di palava of di herders-farmers mata wey dey also affect di region.

Yoruba rights activist, Sunday Adeyemo, popularly known as Sunday Igboho wey dey lead dis rallies say no going back on dia demand.

IYou fit also like to watch dis video

”If Buhari restructure Nigeria today, Sunday Igboho call for separation go stop”
The British Broadcasting Corporation

IBOB and Biafra agitation background

Since afta di 1967 Nigerian civil war popularly known as di “Biafra War” many groups don dey agitate for di Igbo speaking part of Southern Nigeria to go dia separate way.

Diis groups include di Indigenous People of Biafra [IPOB] and di Movement for Actualization of Sovereign State of Biafra [MASSOB]

Di immediate cause of di recent agitation for Biafra inside Nigeria start from di 19 October, 2015.

Dat na wen dem arrest of Nnamdi Nwannekaenyi Kanu, leader of Indigenous People of Biafra, [IPOB], by di kontri secret police Department of State Services [DSS].

Nnamdi Kanu na di director of Radio Biafra, one unlicensed station wey dey crusade for violent struggle to achieve independence for Biafra inside Nigeria’s south east.

Charges against Kanu include sedition, ethnic incitement and treasonable felony.

Some of dis offences carry heavy penalties, from long jail terms to death sentence.

Getty Images
Nnamdi Kanu na im dey operate Radio Biafra

Those wey dey agitate bin dey primarily demand him freedom, but also call for di restoration of Biafra as an independent kontri.

As at today Biafra no dey exist as a unit or form of goment inside Nigeria and di separatists no dey clear about how dem see di territory of di “new Biafra”.

Some claim say e go include all areas wey di Igbo pipo, including parts of di oil-rich Niger Delta ,wey Asari-Dokubo from, to di south and Benue state to di north.

But di oda pipo of dis regions dem don oppose di plan to include dem inside any new Biafra, according to International Crisis Group Nigeria analyst Nnamdi Obasi.

Oda separatists say a restored Biafra go dey limited to five core Igbo states – Abia, Anambra, Ebonyi, Enugu and Imo – also known as Nigeria “South East Zone”.