Aisha Buhari Pantami: President Buhari wife explain why she use Prof. Isa Pantami video on Nigeria security

First Lady Aisha Buhari don explain why she use Prof. Isa Ali Ibrahim Pantami make point about Nigeria situation.

Pantami na Nigeria Minister of Communications and Digital Economy and Islamic cleric.

President Muhammadu Buhari wife Aisha recently post di Minister sermon for her verified Instagram page.

Aisha Buhari use to make point about wetin dey happun regarding di fight against insecurity for di west African nation.

Aisha Buhari Pantami: Wetin dey inside di Instagram video?

Aisha Buhari Pantami: President Buhari wife explain why she use Prof. Isa Ali Ibrahim Pantami video on Nigeria situation

BBC
Aisha Buhari and Pantami

For di video post, Prof. Isa Ali Ibrahim Pantami wey also Islamic cleric wey bin dey preach and weep during quran lesson inside di video.

Pantami bin dey tok about di kill kill wey dey happun during time of President Goodluck Jonathan.

Di goment minister also stress di importance of speaking to authority, fearing only God and not man.

President Muhammadu Buhari wife caption on Sunday after posting video of Pantami dey preach read;

“A cire tsoro ayi abunda ya kamata” in Hausa language wey translate to ‘remove fear and do di right thing’.

Mrs Buhari post start generate reactions immediately.

Some pipo say di first lady don resume di bashing of her husband’s administration wey she bin dey do few years ago.

Why Aisha Buhari use Pantami video?

Aftare di Aisha Buhari Pantami video go viral stories start to fly around about wetin she mean regarding her post.

Aisha Buhari use same Instagram handle to clarify by saying:

She use Pantami video to make point about how doing di right thing without fear will lead to good results.

“Tafsir din Mallam akan tsoron Allah ba tsoron mutum ba.

Da aka cire tsoro da son kai a ka shiga Zamfara abubuwa sun fara kyaw, sai a dage a shiga sauran wajaje haka.”

Dis na wetin Mrs Buhari post in Hausa on Monday

Di meaning na: ” Mallam (Pantami) dey prach about fear of God and not man.

“As dem remove fear and selfishness enter Zamfara state good result don start to show.

“E remain for dem to also enter oda places wey need help.”

Nigeria First Lady and how she dey tack President Buhari goment

No be today Mrs Buhari begin chook mouth for governance mata for Nigeria, particularly under her husban leadership.

For 2016 just two years into her husband’s presidency she comot tok say some pipo don hijack Buhari goment.

Dat statement cause plenti tok at di time with many saying na she dey closest to di president and understand wetin dey happun.

For 2019 she comot blast how some of di president staff dey do dia work naming Garba Shehu in particular.

Dat time she say e dey take instructions from some pipo in goment rather than her husband.

And for December tori start to fly say di first lady don relocate to Dubai over di insecurity wey dey happun.

Although BBC later do tori to confam say although she dey Dubai for months but na oda different reason carry her go.

Aisha Buhari Biography

Aisha Buhari na wife of di presido of di federal republic of Nigeria Muhammadu Buhari.

She come from Adamawa state wey dey northern Nigeria, her grandfather Mohammed Ribadu na di kontri’s first minister of defence.

And her marriage to presido Buhari dey blessed wit five children and a grand daughter.

Aisha na on 17 February, 1971 dem born her inside Adamawa State, north-eastern Nigeria.

Her grandfather Alhaji Muhammadu Ribadu na Nigeria first minister of defence.

Mrs Buhari get Masters Degree in International Affairs from Nigeria Defence Academy.

And her bachelors na in Public Administration from Ambrose Ali university Ekpoma.

Before she start to get her degrees, Mrs Buhari bin start her career for beauty and fashion industry.

Dat na wia she obtain diploma for beauty therapy for United Kingdom and oda certificates from France and United Arab Emirates.

Na she get di popular Hanzy spa and Hanzy Beauty Institute for Kaduna.

And she also be resource pesin for National Board for Technical Education on beauty therapy and cosmetology.

In about 15 years wey she do for di beauty industry she don train hundreds of girls for di sector.

Now she be advocate of girl child education considering say she grow up for area wey girls get disadvantage when e reach education side.