Zamfara state kidnapping: ‘I siddon eat breakfast with my two daughters before dia kidnap ’

Zamfara state latest kidnap:

Getty Images

“As usual, yesterday (Wednesday) morning we siddon as a family eat breakfast together not knowing wetin dey wait to happun few hours later, in fact Ummi dey even tell me her plan for di upcoming exams and how she dey prepare.”

Na so Mallam Makiyyu Maradun father to Ummi and Habiba im two daughters wey gunmen kidnap on Wednesday from government secondary school Kaya, for Zamfara, north western Nigeria tell BBC News Pidgin. E say dis wan hapun few hours to dia kidnap.

E also tok say pesin no dey fit see future assume e dey possible e for tell dem make dem no go school on dat wey di tin hapun.

“Na after dat, dem come start to dey go school while me comot dey go my farm just like every normal day.”

Mallam Maradun say next tin e just receive call say see wetin dey happun and im family never see sleep again since den.

“Goment pipo come meet us yesterday to give our children names, so overall na 73 students dey miss although I hear say later in di night, five students escape come back but I neva see dem.”

Mallam Makiyyu say dis incident no go make im children stop school wen dem eventually return because education dey necessary for dis life.

E add say up till now, di gunmen neva call to make any demands regarding ransom for dia children.

Dis latest kidnapping happun just days afta more than one hundred kidnapped students for three schools regain dia freedom afta many days for captivity.

More than one 1,000 students don dey kidnapped since December – most of dem get freedom afta dia family reportedly pay ransom to di gunmen.

How di kidnap hapun

According to reports, di kidnap happun for Maradun Local Goment Area of di north west Nigerian state on 1 September, 2021.

Residents of di town tell BBC say di gunmen attack early mo-mo and kidnap a high number of students but dem no know di exact number.

Reports say na over 400 students dey di school from di time of di attack.

Dis na students wey dey write mock exams in preparations for final secondary school year.

One teacher for di school wey speak to BBC yan how di thing happun.

“We just dey start today paper and dey discuss with di students dis morning na im we hear sounds of plenty motorcycles.

“And after few seconds we just see di attackers na so we start to run enter nearby farms alongside some students but dem kidnap di rest go.”

Dis na di fifth major kidnap for Zamfara state in di last few months after di one wey happun for Jangebe secondary school, college of agric Bakura suffer three attacks and now dis one for Kaya town.

Di state goment on Monda announce new measures wey include suspension of some markets to helep end di insecurity wahala and on Wednesday after di kidnap dem start 6pm-6am curfew.

For years now northern part of Nigeria dey experience palavas like banditry attacks and kidnapping for ransom.

‘Defend yoursefs’

Zamfara state Governor Bello Matawalle don ask pipo to come out and defend demsefs against bandits and gunmen attacks.

Di govnor tok so for one prayer session for Gusau, di state capital, wey im administration organise to to seek God intervention against banditry.

“I dey call on di pipo of di state, particularly those wey dey di rural areas, to use all di available weapons wey dem fit find and protect themselves whenever di bandits attack dia villages.

“As from today, come out in your numbers and face di bandits if dem come to your villages.

“No sleep for night and if you get any information say di bandits dey come your communities to attack you, try to ambush dem with all di weapons in your possession.

“We need to remove di fear from our minds and face these hoodlums so dat dem go understand say we fit fight dem.” Matawalle tok.

Matawalle tok bin come same day as gunmen on Wednesday morning attack secondary school wia dem kidnap plenti students for di state.

Zamfara state don become hotbed for kidnapping for ransom. For years now northern part of Nigeria dey experience palavas like banditry attacks and kidnapping for ransom.

Dis na di fifth major kidnap for Zamfara state in di last few months after di one wey happun for Jangebe secondary school.Meanwhile, di state goment bin don put out some measures.

On Monday, goment announce new measures wey include suspension of some markets to helep end di insecurity wahala and on Wednesday after di kidnap dem start 6pm-6am curfew.

Di goment don also shut down private and public schools for all di local governments.

Timeline of school kidnappings for Zamfara state in 2021

Jangebe Girls school – Dis one happun on di 26th of February wia gunmen attack di school in di middle of night pack 317 female students go. Dem spend weeks before dia release.

College of Animal science – Dis one happun for July 10th wen gunmen attack di college and kidnap provost of di college, e take days before release

College of Agric Bakura – Dis one happun last month when gunmen attack dis college carry 19 pipo go including a staff and im family. Dem neva release some of dem.

Govt Day School Kaya – Dis one di latest one wey happun on 1st of September after gunmen attack di school in di morning for di govnor home town and according to one teacher and parent na 73 students dey miss at di moment.