Jim Iyke and Uche Maduagwu: Actor Uche Maduagwu challenge Jim Iyke a week afta dia fight

E be like sey pipo never see di last of di gbas-gbos between Nollywood actors Uche Maduagwu and Jim Iyke.

Dis na as Maduagwu still dey demand explanation about di source of wealth of Jim Iyke.

Less dan one week ago Iyke bin go challenge Maduagwu for im office – on August 24, one viral video show wen Iyke confront Maduagwu face to face.

Since dat incident happen e show sey di controversial actor no forget di matter.

Six days afta, Maduagwu go one Lagos Cinema go challenge Jim Iyke again about im source of wealth.

Di cinema na wia Iyke just premier im new movie “Bad Comment”. Di movie na about social media abuse.

Wetin Uche Maduagwu do

“Wia you see N100million wey you use produce di movie”, na question wey Maduagwu throw give Jim Iyke.

Di actor pose di challenge on top Instagram wit video.

“I come di cinema because dem talk say you go come dia today but Jim run when e hear say Uche dey around.

Person spend 100 million naira for one movie; which kain work e dey dey do.

“You come my office, you come beat me up. I dey here, check me out. I dey here, I dey here.

“Dem tell me sey you go come here today Jim Iyke. Dis feem cost N100m; N100m nah im you take do do dis feem. Wia you get your money? How did you get di money?

For dis latest gbas-gbos some pipo dey feel say Uche dey prank pipo.

But dat na wetin BBC Pidgin never fit verify at di time of dis report.

Jim Iyke and Uche Maduagwu fight: How e start

On August 24, one viral video show wen Iyke confront Maduagwu face to face.

Di confrontation na over one comments wey Maduagwu make about Iyke on social media.

From di video, e show say Iyke manage to trace Maduagwu to e location.

Dis na afta Maduagwu question di source of Jim Iyke wealth for one of e post for Instagram.

But dis no be di first time wey Uche Maduagwu dey drag celebrities out for social media.

Who be Uche Maduagwu?

Uche Maduagwu dey known for speaking on controversial issues and dis don make some pipo like and dislike am.

E also dey know as di ‘Red bra guy’ sake of im signature red bra.

For im Instagram page wey dey verify with more than 90k followers, Uche write for e bio say;

E be Actor, Content Creator, Singer, Brand Influencer and Comedian.

Dem born Uche Maduagwu for Amambra, South-East Nigeria according to infomate from multiple sources.

But di actor no ever don post pictures of im parent or siblings for social media.

Even though Uche don get di celebrity status sake of di controversial issues wey e dey chook mouth, e still keep e private life away from social media.

Pipo no know if e don marry, who e dey date or if e get children.

During one interview with LITV for 2017, Uche Maduagwu tok say e start im career as a singer wen dem ask am wetin make am go into acting.

E say im feel say starting as singer go make am popular but God get better plan for am.